बीडमध्ये गुन्हेगारी प्रकरणानं उच्छाद मांडला असल्याची चर्चा आहे. मस्साजोगचे सरपंच संतोष देशमुख, व्यापारी महादेव मुंडे यांच्या हत्या प्रकरणातील अनेक बाबी समोर येत आहेत. अशातच महादेव मुंडे हत्या प्रकरणातील आरोपी आणि कुख्यात गुन्हेगार गोट्या गीतेचा आणखी एक व्हिडिओ सोशल मीडियावर व्हायरल झाला आहे. या व्हिडिओमुळे परिसरात खळबळ उडाली आहे.

सरपंच संतोष देशमुख हत्या प्रकरणातील मुख्य सूत्रधार वाल्मीक कराडला सीआयडीचे अधिकारी पुण्याहून बीडला आणत असताना, गोट्याने पोलिसांच्या गाडीचा पाठलाग केला आणि व्हिडिओ शूट केला. तसेच सोशल मीडियावर शेअर केला.

गोट्या गितेविरूद्ध जिल्ह्यासह इतर ठिकाणी तब्बल ४३ गंभीर गुन्हे दाखल असून, त्याच्यावर मकोका सारखी कठोर कारवाई देखील आहे.

तरीही, पोलिसांच्या गाडीजवळ आणि त्यांच्यासोबत फिरण्याचे धाडस त्याने कसे केले, हा गंभीर प्रश्न उपस्थित होत आहे. या प्रकारानंतर बीडमध्ये पोलिसांच्या कार्यपद्धतीवर प्रश्नचिन्ह उपस्थित झाले आहे. फरार गुन्हेगार पोलिसांच्या अगदी जवळ असूनही अटक का केली नाही? हा संतापजनक सवाल स्थानिकांनी उपस्थित केला आहे.

दरम्यान, परळी पोलिसांनी नागरिकांना आरोपी गोट्या गिते दिसल्यास संपर्क साधण्याचे आवाहन केले आहे. मात्र,  गोट्याच्या विरोधात अनेक गंभीर स्वरूपाचे गुन्हे दाखल आहेत. जिल्ह्यासह इतर ठिकाणी त्याच्या विरोधात ४३ गुन्हे दाखल असताना, पोलिसांकडून ‘विशेष वागणूक’ दिली जात असल्याची चर्चा बीडमध्ये रंगली आहे.