Beed Parli Rada, dhananjay munde vs rajesaheb Deshmukh : विधानसभा निवडणुकीसाठी २८८ मतदारसंघात सकाळपासून मतदान सुरु आहे. पण काही ठिकाणी राडा झाल्याचं समोर आलेय. त्यामध्ये वरळी, परळी, बारामती, धुले, सिल्लोड यासारख्या मतदारसंघाचा समावेश आहे. परळीमध्ये राष्ट्रवादी काँग्रेस आणि राष्ट्रवादी काँग्रेस (पवार गट) यांच्यामध्ये संघर्ष पाहायला मिळाला. ऐन थंडीमध्ये दोन्ही राष्ट्रवादीच्या कार्यकर्त्यांमध्ये गरमागरमी झाल्याचं समोर आलेय.

मिळाल्या माहितीनुसार, परळीमध्ये शरद पवार यांच्या कार्यकर्त्याला जोरदार मारलेय. याचा व्हिडीओ सोशल मीडियावर व्हायरल झालाय. परळीमध्ये अजित पवार यांच्या राष्ट्रवादी काँग्रेसकडून धनंजय मुंडे मैदानात आहेत. तर शरद पवार यांच्या राष्ट्रवादी काँग्रेसकडून राजेसाहेब देशमुख यांचं आव्हान असेल.

परळीत राष्ट्रवादी विरुद्ध राष्ट्रवादी संघर्ष पेटला

बीडच्या परळी मतदारसंघात राष्ट्रवादी विरुद्ध राष्ट्रवादी संघर्ष पेटला आहे. धनंजय मुंडे यांच्या कार्यकर्त्यांनी शरद पवार गटाचे कार्यकर्ते माधव जाधव यांना मारहाण केलीय. या घटनेचा व्हिडिओ सध्या सोशल माध्यमावर व्हायरल होतोय. आज मतदान प्रक्रियेवेळी माधव जाधव परळी शहरातील मतदान केंद्रास भेट देण्यासाठी गेले होते. त्यावेळी त्यांना ही मारहाण झालीय. परळी मतदारसंघात विधानसभा निवडणुकीत देखील बोगस मतदान होत असल्याचा आरोप उमेदवार राजेसाहेब देशमुख यांनी केला होता. याचा व्हिडिओ देखील माध्यमांसमोर आणण्यात आला. आता राजेसाहेब देशमुख यांच्यासोबत फिरणाऱ्या या कार्यकर्त्याला मारहाण झाल्याचं समोर आलंय.

परळीत मतदान केंद्रावरील सामनाची तोडफोड

परळी मतदारसंघातील घाटनांदुर येथे मतदान केंद्रातील सामानाची तोडफोड करण्यात आली आहे.. यामध्ये ईव्हीएमचा देखील समावेश असल्यास सांगितले जात आहे, दरम्यान ही तोडफोड कोणी केली ? हे अद्याप स्पष्ट झालं नाही. पण घाटनांदुर परिसरात तणावाचे वातावरण आहे.