बीड : विधानसभा सार्वत्रिक निवडणुकीचा कार्यक्रम घोषित झाला आहे. त्यानुसार येत्या २० नोव्हेंबरला मतदानाची प्रक्रिया पार पडणार आहे. या दिवशी बीड जिल्ह्यातील सर्व आठवडी बाजार बंद ठेवण्याबाबत जिल्हा निवडणूक अधिकारी तथा जिल्हाधिकारी अविनाश पाठक यांनी आदेश काढले आहेत. 

विधानसभा निवडणुकीच्या (Vidhan Sabha Election) कार्यक्रमानुसार २० नोव्हेंबरला मतदानाची प्रक्रिया पार पडणार आहे. मतदानाचा हक्क सर्वाना बजावता यावा; यासाठी मतदानाच्या दिवशी सुटी जाहीर करण्यात आली आहे. मात्र व्यावसायिक व बाजारातील विक्रेते आपला व्यवसाय बंद ठेवत नाही. परिणामी अनेकजण मतदानाच्या हक्कापासून दूर राहत असतात. यामुळे जिल्हाधिकारी अविनाश पाठक यांनी आठवडे बाजार बंद ठेवण्याबाबत आदेश काढले आहेत.  

अन्य दिवशी भरविला जाणार बाजार 

बीड (Beed News) तालुक्यातील चौसाळा, गेवराईतील गेवराई, गुळज, मारफळा, राजपिंप्री, मालेगाव खु., किनगाव, शिरूर कासारमधील जाटनांदूर, मातोरी, पाटोद्यातील पिठ्ठी, आष्टी तालुक्यातील पिंपळा, दौलावडगाव, खडकत, आष्टा ह.ना. केरूळ, डोईठाण, हातोला, माजलगाव तालुक्यातील मोठेवाडी, एकदरा, गंगामसला, माजलगाव, वडवणी तालुक्यातील वडवणी, अंबाजोगाईतील लोखंडी सावरगाव, केजमधील लव्हुरी, बोरगाव बु., परळी तालुक्यातील पोहनेर, नागापूर याठिकाणी बुधवारी आठवडे बाजार भारत असतो. अर्थात मतदानाच्या दिवशी भरणारे आठवडी बाजार अन्य दिवशी भरविण्यात यावे, असेही आदेशात नमूद आहे.