योगेश काशीद 
बीड : संतोष देशमुख हत्या प्रकरणाची चौथी सुनावणी बीडच्या विशेष न्यायालयासमोर आज घेण्यात आली. मात्र न्यायाधीश पाटोदकर हे रजेवर असल्यामुळे हे प्रकरण विशेष न्यायाधीश शिंदे यांच्याकडे वर्ग करण्यात आले. सुनावणी घेत न्यायाधीश शिंदे यांनी या प्रकरणात पुढील सुनावणीसाठी १९ मे हि तारीख दिली आहे. 

बीडच्या मस्साजोग येथील संतोष देशमुख हत्या प्रकरणाला १४० पेक्षा अधिक दिवस झाले आहेत. तरीही या प्रकरणातील मुख्य आरोपी कृष्णा आंधळे अद्याप फरार आहे. तर देशमुख हत्या प्रकरणातील दुसरा मुख्य आरोपी वाल्मिक कराड बीडच्या तुरुंगात आहे. या प्रकरणाची सुनावणी बीड येथील विशेष न्यायालयात सुरु असून या प्रकरणी आज सुनावणीची तारीख होती.

सुनावणी न होताच पुढील तारीख 

संतोष देशमुख हत्या प्रकरणाची चौथी सुनावणी बीडच्या विशेष न्यायालयामध्ये आज होणार होती. मात्र विशेष न्यायाधीश पाटोदकर हे रजेवर असल्यामुळे हे प्रकरण तात्पुरते न्यायाधीश शिंदे यांच्या कोर्टात सुनावणी ठेवण्यात आली होती. मात्र आजच्या दिवशी सुनावणी न होताच न्यायाधीश शिंदे यांनी देशमुख हत्या प्रकरणी सुनावणीसाठी १९ मे ही तारीख देण्यात आली आहे.

सरकारी वकीलही गैरहजर 

दरम्यान आजच्या सुनावणीसाठी सरकारी वकील उज्वल निकम हे देखील गैरहजर होते. त्यांच्या जागी विशेष सहाय्यक सरकारी वकील बाळासाहेब कोल्हे यांनी काम पहिले. मात्र सुनावणीसाठी आरोपी वाल्मीक कराडचे वकील विकास खाडेकर हे देखील गैरहजर होते. तर आरोपी विष्णू चाटेचे वकील न्यायालयात हजर आहेत.