बीड : शासनाकडून पुरवठा होणारे स्वस्त धान्य दुकानातील धान्य निकृष्ट दर्जाचे असल्याचे समोर आले आहे. बीड जिल्ह्यात देखील हा प्रकार समोर आला असून या विरोधात सामाजिक कार्यकर्ते आक्रमक झाले आहेत. हा प्रकार प्रशासनाच्या लक्षात आणून देण्यासाठी स्वस्त धान्य दुकानातील तांदळाची खिचडी बनवून तहसीलदारांच्या टेबलावर आणून ठेवली आहे. 

बीड जिल्ह्यातील स्वस्त धान्य दुकानांवर सर्वसामान्यांना निकृष्ट दर्जाचे धान्य वाटप होत असल्याचा प्रकार समोर आला आहे. त्यामुळे याच प्रश्नाकडे लक्ष वेधण्यासाठी सामाजिक कार्यकर्त्यांनी तहसील कार्यालयाबाहेर स्वस्त धान्य दुकानातील तांदळाची खिचडी शिजवली. यानंतर हि खिचडी तहसीलदारांना भेट दिली. ही खिचडी थेट तहसीलदाराच्या टेबलवर मांडत त्यांना या प्रश्नावर तात्काळ उपाययोजना करण्याची मागणी सामाजिक कार्यकर्त्यांनी केली आहे.

बीड तालुक्यातील अंजनवती, चराटा, काळेगाव हवेली यासह इतर गावांमध्ये निकृष्ट दर्जाचे स्वस्त धान्याचे वितरण होत आहे. याबाबत तक्रार करून देखील चांगल्या धान्याचा पुरवठा केला जात नसल्याचे समोर आले आहे. त्यामुळे ग्रामस्थांसह सामाजिक कार्यकर्त्यांनी हे लक्षवेधी आंदोलन केले आहे. दक्षता समिती केवळ कागदोपत्री असून ती सक्षम केली जावी, जेणेकरून यावर नियंत्रण होईल. असे मत सामाजिक कार्यकर्त्यांनी व्यक्त केले आहे. 

चौकशी करून दोषीवर कारवाई करणार

दरम्यान सामाजिक कार्यकर्त्यांनी आंदोलन करत धान्याबाबत केलेल्या मागण्यांवर आपण सकारात्मक निर्णय घेणार असून सर्वच दुकानदारांना लेखी सूचना देणार असल्याचे तहसीलदार चंद्रकांत शेळके यांनी म्हटले आहे. तसेच चौकशी करून दोषीवर कारवाई करणार असल्याचे आश्वासन देखील आंदोलनकर्त्यांना दिले आहे.