बीड : राजकारण म्हटले म्हणजे यात सर्वकाही विसरले जाते. अर्थात निवडणुकीच्या रिंगणात उतरल्यानंतर नातेसंबंध न पाहता निवडणूक लढविली जाते. त्यानुसार बीडमधील राजकारणात पाहण्यास मिळत आहे. याठिकाणी मुलाच्या विरोधात वडीलच प्रचारासाठी मैदानात उतरले असून मुलाऐवजी पुतण्यासाठी मत मागताना दिसून येत आहेत.  

बीडच्या (Beed) राजकारणाची चर्चा नेहमी राज्यभरात होत असते. यावेळी मात्र काही वेगळे चित्र बीडमध्ये पाहायला मिळत आहे. बीडमध्ये विद्यमान आमदार संदीप क्षीरसागर यांची लढत त्यांचे चुलत भाऊ डॉ. योगेश क्षीरसागर यांच्याशी होत आहे. परंतु या लढाईत संदीप क्षीरसागर यांचे वडील रवींद्र क्षीरसागर, सख्खे भाऊ हेमंत क्षीरसागर हे मात्र त्यांच्या विरोधात प्रचार करत असल्याचे पाहायला मिळत आहेत. यामुळे बीडमधील निवडणुकीत रंगत भरली आहे. 

दरम्यान नवगन राजुरी या क्षीरसागर यांच्या मूळ गावी झालेल्या सभेत रवींद्र क्षीरसागर यांनी त्यांचा मुलगा आमदार संदीप क्षीरसागर यांच्यावर आरोप करत या निवडणुकीत पुतण्या डॉ. योगेश क्षीरसागर यांनाच मतदान करा, असे आवाहन केले. आता थेट वडीलच मुला ऐवजी पुतण्याला मतदान करण्याचे आवाहन करत असल्याने याची जोरदार चर्चा होताना दिसत आहे.