भरत मोहळकर, साम टीव्ही, प्रतिनिधी

विधानसभा निवडणुकीनंतर शिस्तबद्ध पक्ष अशी ओळख असलेल्या भाजपमध्ये बीडमधल्या दोन नेत्यांमधला संघर्ष अखेर असा समोर आला. सुरेश धसांनी वारंवार पंकजा मुंडेंवर निशाणा साधल्याने पंकजा मुंडेंनी थेट पक्षश्रेष्ठीचं दार ठोठावलंय. तर पंकजांच्या इशाऱ्यानंतर सुरेश धसांनीही पक्षश्रेष्ठींकडे धाव घेण्याचा इशारा दिलाय.

आरोप-प्रत्यारोपानंतर पंकजा मुंडे आणि सुरेश धस आमने-सामने आले.. मात्र दोघांनी एकमेकांकडे बघण्याचंही टाळलंय. भाजपमधील अंतर्गत वाद चव्हाट्यावर आल्याने विरोधी पक्षाला आयतंच कोलित मिळालयं..

भाजपातील वाद चव्हाट्यावर

खरंतर पंकजा मुंडे आणि सुरेश धसांच्या वादाचं मूळ हे विधानसभा निवडणुकीत आहे पंकजा मुंडेंनी अपक्ष उमेदवार भिमराव धोंडेंचं काम केल्याचा आरोप धसांनी केला होता. आधीच धनंजय मुंडेंशी असलेलं वैर आणि त्यात पंकजा मुंडेंची भर पडल्याने धसांनी आपला मोर्चा मुंडे बंधू भगिनींविरोधात उघडला. दरम्यान पंकजा मुंडेंनी सरपंच संतोष देशमुखांच्या हत्येनंतर तब्बल तीन महिने उलटून गेले तरी देशमुख कुटुंबियांची सांत्वनपर भेट न घेतल्याने धसांनी थेट पंकजा मुंडेंना फैलावर घेतलंय.

शिस्तबद्ध पक्ष असलेल्या भाजपमधील धस आणि मुंडेंमधील संघर्ष समोर आलाय. पक्षाची प्रतिमा मलिन होण्यापासून रोखण्यासाठी पंकजा मुंडेंच्या तक्रारीची दखल घेणार की पक्षश्रेष्ठीच पंकजा मुंडेंना जेरीस आणण्यासाठी धसांना ताकद देणार? याकडे लक्ष लागलंय.