बीड : बीड जिल्हा परिषद कार्यालयासमोर उपोषणासाठी बसलेल्या उपोषणकर्त्याचे मध्यरात्री अंथरूण पेटवून दिले. मात्र (Beed News) उपोषणकर्त्यांना जाग आल्याने, मोठा अनर्थ टळला आहे. उपोषणकर्त्याला अज्ञात व्यक्तीने जीवंत जाळण्याचा प्रयत्न केल्याने खळबळ उडाली आहे. (Live Marathi News)

चरणदास वाघमारे असे उपोषणकर्त्याचे नाव आहे. शिरुर कासार तालुक्यातील तागडगाव येथील (कै.) सुभद्राबाई माध्यमिक विद्यालयात सहशिक्षक आहेत. परंतु त्यांचा पगार होत नसल्याने पगार द्यावा म्हणून बीड जिल्‍हा परिषदेच्‍या माध्यमिक शिक्षणाधिकारी यांच्या कार्यालयासमोर उपोषणाला बसले आहेत.

आंदोलनस्थळीच मुक्कामी असताना मध्यरात्री १२ वाजण्याच्या दरम्यान त्यांच्या डोक्याखाली असलेल्या उशीला व अंथरुणाला अज्ञात व्यक्तिने आग लावली. डोक्याला गरम लागताच ते जागे झाले. त्यामुळे त्यांचा जीव वाचला आहे. जाणीवपूर्वक मला जाळण्याचा हा प्रयत्न केला गेला, असा आरोप वाघमारे यांनी केला.