Beed News: बीडमध्ये प्रशासनाच्या धोरणाचा बळी गेल्याची धक्कादायक घटना समोर आली आहे. शासकीय जमिनीवरील घर काढा अशी नोटीस बीड तालुका प्रशासनाने दिल्यानंतर, बीड शहरातील भारत अवचार या 42 वर्षीय व्यक्तीने विषारी औषध प्राशन केले होते. मात्र चार दिवस उपचार केल्यानंतर भारत अवचार यांची मृत्यूची झुंज अपयशी ठरली असून आज अवचार यांची उपचारादरम्यान प्राणज्योत मालवली आहे.

याबाबत अधिक माहिती अशी की, शासकीय जमिनीवरील घर काढा अशी नोटीस बीड (Beed) तालुका प्रशासनाने काही दिवसांपूर्वी दिली होती. ज्यामुळे भारत अवचार या ४२ वर्षीय व्यक्तीने आत्महत्या केल्याचे समोर आले आहे. गेल्या 40 वर्षांपासून आम्ही इंदिरानगर भागामध्ये राहतोय. मात्र प्रशासनाची भूमिका ही आता आमच्या घरावर उठली आहे. तालुका प्रशासनाने संबंधित घर काढा अशी नोटीस दिली आहे.

मात्र त्याच जागेवर "नगरपालिकेने रमाई घरकुल आवास योजनेअंतर्गत भारत अवचार यांना घरकुल दिलं आहे. त्यामुळे अवचार यांनी या योजनेच्या पैशातून आणि उसनवारी करून घर बांधलं. मात्र बांधलेलं घर पाडा, अशी नोटीस दिल्यानंतर आता आपण राहायचं कुठं ? या विवचनेतून भारत अवचार यांनी 13 जून रोजी विष प्राशन केले आणि चार दिवसाच्या उपचारानंतर आज त्यांचा उपचारादरम्यान मृत्यू झाला.

या घटनेनंतर संबंधित दोषींवर कारवाई करावी, भारत अवचार यांच्या परिवाराला न्याय द्यावा. अशी मागणी घेत बीडच्या जिल्हा रुग्णालयात नातेवाईकांसह स्थानिकांनी ठिय्या आंदोलन सुरू केलं आहे. तसेच जोपर्यंत दोषींवर कारवाई होत नाही तोपर्यंत शवविच्छेदन होऊ देणार नसून मृतदेह ताब्यात घेणार नाही, असाच पवित्रा नातेवाईकांनी घेतला आहे. (Latest Marathi News)