Beed Accident News : बीड जिल्ह्यात अपघाताची मालिका सुरूच असल्याचं चित्र पाहायला मिळत आहे. काल एकाच दिवशी विविध अपघातात, चार दुचाकीस्वार तर अन्य एक महिला असे 5 जण ठार झाले आहेत.

बीड जिल्ह्यात गेल्या आठ दिवसांपासून अपघाताची मालिका सुरू आहे. तीन दिवसांपूर्वी परळी अंबाजोगाई महामार्गावर अपघात झाल्याने 3 दुचाकीस्वार ठार झाले होते. त्याचबरोबर गडी फाट्यावर देखील एक जण ठार झाला होता.

तर मंगळवारी रात्री देखील ट्रकने दुचाकी स्वराला चिरडल्याने तो जागीच ठार झाला होता. या सर्व घटना ताज्या असतानाच काल एकाच दिवशी विविध अपघातात (Accident) 5 जणांचा मृत्यू झाला आहे.

बीडच्या (Beed) आष्टी तालुक्यातील कडा येथील मार्केट कमिटी समोर ट्रकने दुचाकीला समोरासमोर धडक देत, दुचाकीस्वाराला फरफटत नेलं. यामुळं दुचाकीवर बाबासाहेब गर्जे वय 47 आणि नारायण गोल्हार वय 51 दोघे रा. खिळद हे दोघे जागीच ठार झाले आहेत.

तर काल (१५ फेब्रुवारी) सायंकाळी गडी फाटा इथे एक, सायंकाळी बीड शहरातील तेलगाव नाका परिसरात एक, केज तालुक्यात एक असे विविध अपघातात 3 जण ठार झाले आहेत. या घटनांनी परिसरात हळहळ व्यक्त केली जात आहे. दरम्यान वाहनधारकांनी आपली वाहनं काळजीपूर्वक चालवावीत, वाहनांचा वेग मर्यादेतच ठेवावा. असं आवाहन पोलीस प्रशासनाकडून केलं जात आहे.