बीडच्या आष्टी तालुक्यातून एक ह्रदयद्रावक घटना समोर आली आहे. अवकाळी पावसामुळे शेतीचे मोठ्या प्रमाणावर नुकसान झाल्याने आणि वाढत्या कर्जबाजारीपणाला कंटाळून एका शेतकऱ्याने आत्महत्या केल्याची दुर्दैवी घटना उघडकीस आली आहे. हवालदिल शेतकऱ्यानं शेतातच झाडाला गळफास घेऊन जीवन संपवलं आहे. ही घटना समोर आल्यानंतर संपूर्ण गावात शोककळा पसरली आहे.

गेल्या काही दिवसांपासून अनेक भागात मुसळधार पावसाने हजेरी लावली आहे. मुसळधार पावसामुळे जनजीवन विसकळीत झाले आहे, सोबत शेतकऱ्यांना याचा मोठा फटका बसला आहे. अवकाळी पावसामुळे शेतीचे मोठ्या प्रमाणात नुकसान झाले आहे. यामुळे शेतकऱ्यांच्या डोक्यावर आर्थिक संकट घोंघावत आहे. अशातच शेतीचे नुकसान आणि आर्थिक विवंचनेला कंटाळून बीडच्या एका शेतकऱ्याने आत्महत्या केली आहे.

गोविंद रंगनाथ आंधळे (वय ४२) असे शेतकऱ्याचे नाव आहे. मिळालेल्या माहितीनुसार, अवकाळी पावसामुळे त्यांच्या शेतातील कांद्याचे मोठ्या प्रमाणात नुकसान झाले होते. याशिवाय, त्यांच्या डोक्यावर सुमारे १० लाख रुपयांचे कर्ज असल्याचे समजते. या आर्थिक अडचणींमुळे त्यांनी स्वतःच्या शेतातच झाडाला गळफास घेऊन जीवन संपवलं.

ही घटना समोर आल्यानंतर संपूर्ण गावात शोककळा पसरली आहे. शासनाने आणि प्रशासनाने वेळेवर मदत केली असती, तर हे टाळता आले असते, अशी भावना ग्रामस्थांतून व्यक्त होत आहे. "शेतकऱ्यांच्या आत्महत्या थांबवण्यासाठी सरकार अजून किती वेळ थांबणार?" असा संतप्त सवाल आता जनतेकडून विचारला जात आहे.

वारजे टेकडी परिसरात एकाचा संशयास्पद मृत्यू

पुणे : शहरातील वारजे टेकडी परिसरात एक संशयास्पद मृत्यूची घटना समोर आली आहे. या व्यक्तीने गळफास घेऊन आत्महत्या केल्याची प्राथमिक माहिती पोलिसांनी दिली आहे. मिळालेल्या माहितीनुसार, ही घटना मंगळवारी (३१ मे) सकाळी उघडकीस आली. परिसरातील नागरिकांना एक व्यक्ती झाडाला लटकलेली दिसल्यावर त्यांनी तातडीने पोलिसांना माहिती दिली. घटनास्थळी पोहोचून पोलिसांनी पाहणी केली असता, संबंधित व्यक्तीचा मृत्यू झाल्याचे निष्पन्न झाले. सध्या पोलिसांकडून तपास सुरू आहे.