भरत मोहळकर, साम टीव्ही, प्रतिनिधी

अमानुष मारहाण करणारा, नोटा उधळणारा, हेलिकॉप्टरमधून फिरुन दहशत माजवणारा खोक्या. पोलिसांच्या रडारवर आलेल्या खोक्याच्या अखेर मुसक्या आवळल्यात. पाप धुण्यासाठी प्रयागराजला गेलेल्या खोक्याला स्थानिक पोलिसांनी आणि उत्तर प्रदेश पोलिसांनी बेड्या ठोकल्यात.

खोक्याभाई जाळ्यात कसा अडकला?

- सतीश भोसले बसनं प्रवास करत प्रयागराजला पोहोचला होता

- प्रयागराजवरून विमानानं पळून जाण्याच्या तयारीत होता

- बीडचे आणि प्रयागराज पोलीस अधीक्षकांच्या मदतीनं विमानतळावरुन अटक

- सतीश भोसले वापरत असलेला मोबाईल नंबर पोलिसांना मिळाला होता

- पोलिसांनी त्यावरूनच लोकेशन ट्रेस केलं आणि खोक्या अडकला

तर आपल्या कार्यकर्त्याच्या अटकेचं भाजप आमदार सुरेश धसांनी स्वागत केलंय.. तर विरोधकांनी याप्रकरणी अधिक खोलात जाऊन चौकशी करण्याची मागणी केलीय. खोक्या भोसलेच्या अमानुष मारहाणीचा व्हिडीओ व्हायरल झाल्यानंतर खोक्या भोसले आठ दिवस पोलिसांना गुंगारा देत होता. अखेर खोक्या भोसलेला पोलिसांनी जेरबंद केलंय.. यादरम्यान खोक्या भोसलेचे अनेक कारनामे समोर आलेत.

खोक्यावर कोणते आरोप?

- खोक्याने दिलीप ढाकणे आणि महेश ढाकणेंना मारहाण केल्याचा आरोप

- बुलढाण्याच्या कैलास वाघला अमानुष मारहाण

- हरीण, काळवीट, मोर आणि सश्यांच्या कत्तलीचा आरोप

- शाळेत जाऊन विद्यार्थ्यांना धमकी

- नोटा उधळून माज दाखवल्याचा आरोप

खोक्या भोसलेचे कारनामे समोर आल्यानंतर पोलीस खोक्याच्या मागावर होते.. त्यामुळे पोलिसांना गुंगारा देण्यासाठी खोक्याने थेट प्रयागराज गाठून गंगेत डुबकी मारली.. त्याआधी देशमुखांच्या हत्येनंतर वाल्मिक कराडही पोलीस संरक्षणासह उज्जैनच्या महाकालपुढे नतमस्तक झाला आणि त्यानंतर पोलिसांना शरण आला.. तर आता कृष्णा आंधळेही दक्षिण काशी समजल्या जाणाऱ्या नाशिकमध्ये आढळून आलाय.. त्यामुळे गंभीर गुन्ह्यातील गुन्हेगारांनी देवापुढे लोटांगण घातलं तरी देवही त्यांना माफ करत नसल्याचंच सिध्द झलंय. आता खोक्या तर अडकला असला तरी पोलीस खोक्यानंतर त्याच्या आकाच्याही मुसक्या आवळणार का? याकडे लक्ष लागलंय..