गुन्हेगारीमुळे राज्यभरात चर्चेत असणारा बीड जिल्हा पुन्हा एकदा चर्चेत आलाय. यावेळीही गुंडगिरीमुळेच बीड चर्चेत आलंय. पण यावेळी कायद्याचं रक्षण करणाऱ्या पोलिसांच्या गुंडगिरीमुळे बीड चर्चेत आलंय. बीड जिल्ह्यात गुंडांनी धुडघूस घातलाय. खून, दरोडे, चोरी, अपहरणासारखे प्रकार सर्स होत आहेत. आता तर एका पोलीस अधिकाऱ्यानेच व्यापाऱ्याला धमकावत त्याच्याकडे पैसे उकाळल्याची घटना घडलीय.मुंबईतील सराफ व्यापाऱ्याला बीडमधील शिवाजीनगर ठाण्यातील काही पोलिसांनी लुटल्याची घटना घडलीय.

शिवाजीनगर पोलीस ठाण्यातील अधिकारी गजानन क्षीरसागर यांच्यासह इतर पोलिसांनी व्यापाऱ्याला धमकी दिली. त्यांच्याकडून पैसे उकाळले. यासंबंधीची तक्रार आता पोलीस अधीक्षकांकडे करण्यात आलीय. पीडित सराफाचे नाव मयंक शांतीलाल जैन आहे. मुंबई येथील सराफा व्यापारी मयंक शांतीलाल जैन हे २४ नोव्हेंबर रोजी बीडला गेले होते. त्यावेळी ते शहरातील विशाल लॉजवर मुक्कामासाठी थांबले होते.

त्यावेळी अचानक शिवाजीनगर पोलीस स्टेशनचे सहाय्यक पोलीस निरीक्षक गजानन क्षीरसागर आणि इतर पोलीस कर्मचाऱ्यांनी त्यांच्या रूममध्ये धाड टाकली. त्यांच्याकडे असलेल्या सोन्याच्या मालासह मोबाईल ताब्यात घेतला. फोन स्वीच ऑफ करत मयंक जैन यांना पोलिसांनी धमकावलं. त्यांच्याकडे सात लाख रुपयांची मागणी केली.

रुममध्ये आलेल्या पोलिसांनी मयंक जैन यांना मेडिकलचे कारण सांगून बीडमधील एका दुसऱ्या व्यापाऱ्याकडून चार लाख रुपये मागवण्यास सांगितले. ही चार लाखांची रुपये रोख रक्कम गजानन क्षीरसागर यांनी घेतली. त्यानंतर पोलीस अधिकाऱ्याने इतर तीन लाख रुपये दुसऱ्या दिवशी सकाळी बारा वाजेपर्यंत आणून दे असं धमकावलं.

पोलिसांनी मयंक जैन यांना दुसऱ्या लॉजवर रात्रभर डांबून ठेवलं होतं. त्यानंतर त्यांना सकाळी सोडून दिलं. सुटका झाल्यानंतर मयंक जैन यांनी आपबिती त्यांच्या व्यापारी मित्रांना सांगितली. त्यानंतर या संदर्भात पोलीस अधीक्षकांकडे तक्रार करण्यात आली.