योगेश काशिद, साम टीव्ही, प्रतिनिधी

बीडमधल्या शिरूर तालुक्यातील एका व्यक्तीला मारहाण केल्याचा व्हिडीओ सोशल मीडियावर व्हायरल होत आहे. या व्हिडीओत मारहाण करणाऱ्या व्यक्तीचे नाव सतीश भोसले असल्याचे समोर आले. हा सतीश भोसले भाजपचे आमदार सुरेश धस यांचा निकटवर्तीय असल्याचे म्हटले जात आहे. सतीश भोसले उर्फ खोक्या गुन्हेगारी क्षेत्रात सक्रीय असल्याचे समोर आले आहे.

सतीश भोसले हा राजकारणात सक्रीय आहे. भाजपच्या महाराष्ट्र भटक्या विमुक्त आघाडीचे पद त्याच्याकडे आहे. सतीशने महेश ढाकणे या तरुणाला बॅटने जबर मारहाण केली होती. मारहाणीचा व्हिडीओ व्हायरल झाल्यानंतर हे प्रकरण समोर आले. सतीशने ढाकणे याच्या वडील दिलीप ढाकणे यांना दात तुटेपर्यंत मारहाण केली होती.

दरम्यान सतीश भोसले उर्फ खोक्या हा गुन्हेगारी विश्वात सक्रीय असल्याची माहिती समोर आली आहे. त्याच्यावर बीड जिल्ह्यातील अमळनेर, शिरूर आणि अहिल्यानगर जिल्ह्यातील शेवगाव पोलीस स्टेशनमध्ये गंभीर स्वरुपाचे गुन्हे आहेत.

- २०२१ मध्ये कलम ३०७ अंतर्गत प्रयत्नात्मक खून (Attempt to Murder)

- २०२० मध्ये कलम ४९८ अ अंतर्गत कौटुंबिक गुन्हा (Family Crime)

- २०२० मध्ये कलम ३०४ अंतर्गत ठार मारण्याचा प्रयत्न नसताना घडलेला मृत्यू (Culpable Homicide Not Amounting to Murder)

- आर्मी ॲक्ट नुसार गुन्हा दाखल आहे.

सतीश भोसलेचे काही व्हिडीओ सोशल मीडियावर व्हायरल होत आहेत. एका व्हिडीओमध्ये तो कारमध्ये बसून नोटांची बंडलं फेकताना दिसत आहे. दुसऱ्या व्हायरल व्हिडीओमध्ये सतीश हॅलिकॉप्टरमधून उतरताना दिसतो. माज दाखवणाऱ्या खोक्या उर्फ सतीश भोसलेचा माज उतरवण्यासाठी पोलिसांची दोन पथके रवाना झाली असल्याची माहिती समोर आली आहे.