योगेश काशीद 
बीड : बीडमध्ये दिवसेंदिवस गुन्हेगारी प्रवृत्ती वाढत चालली आहे. अगदी क्षुल्लक कारणांवरून टोकाची भूमिका घेतली जात आहे. यातच तरुणाला धमकावण्याचा व्हिडीओ केला. यानंतर तो व्हिडीओ सोशल मीडियावर व्हायरल केला. याचा जाब विचारण्यावरून थेट तरुणाची बोटे छाटण्यात आल्याची धक्कादायक घटना बीडमध्ये घडली आहे. या प्रकरणी पोलिसात गुन्हा दाखल करण्यात आला आहे.

बीडमध्ये मागील काही दिवसात गुन्हेगारीचे प्रमाण वाढले आहे. अशीच पुन्हा एक घटना घडली असून यात कोयता आणि सत्तुरने तरुणाला धमकावून व्हिडिओ समाज माध्यमांवर व्हायरल करण्यात आला. हा व्हिडिओ व्हायरल का केला? याचा जाब मारहाण झालेल्या तरुणाने विचारला. हा राग मनात धरून तरुणाच्या हाताचे बोटे छाटण्यात आल्याचा धक्कादायक प्रकार बीड शहरात घडला आहे. 

अज्ञात स्थळी नेत केली मारहाण 

तीन दिवसांपूर्वी शेख अलीम अनिस या तरुणाला चार जणांच्या टोळक्या कडून कोयता आणि सत्तुरने धमकावले जात असल्याचा व्हिडिओ व्हायरल करण्यात आला. या घटनेतील मुख्य आरोपी मारहाण झालेल्या तरुणाचा मित्रच आहे. हा व्हिडिओ इतर मित्रांना का दाखवतो? याचा जाब अनिसने विचारला. त्याच्या मित्राने गाडीवर बसवून अज्ञातस्थळी नेत मारहाण केली. या मारहाणीत तरुणाचे बोट छाटण्यात आले.

चार जणांवर गुन्हा दाखल 

दरम्यान या प्रकरणी पेठ बीड पोलीस ठाण्यात चार जणांविरोधात गुन्हा दाखल करण्यात आला असून एका आरोपीला पोलिसांनी अटक केली आहे. उर्वरित तीन आरोपींचा शोध पोलीस घेत आहेत. खून, दरोडा, विनयभंगासारख्या घटना ताज्या असताना आता मित्रानेच मित्राचे बोटे छाटल्याने बीड मध्ये मात्र पुन्हा दहशतीचे वातावरण पसरले आहे.