संपूर्ण देशाचे लक्ष लागलेल्या बारामती विधानसभा मतदारसंघाचे निकाल हाती येण्यास सुरूवात झाली आहे. या मतदारसंघामध्ये महायुतीमधील राष्ट्रवादी काँग्रेस अजित पवार गटाकडून अजित पवार तर महाविकास आघाडीतील राष्ट्रवादी काँग्रेस शरद पवार गटाकडून युगेंद्र पवार यांनी निवडणूक लढली. या मतदारसंघामध्ये काका आणि पुतण्यामध्ये काँटे की टक्कर सुरू आहे.

हा मतदारसंघ अजित पवारांसाठी खूपच महत्वाचा असून अजित पवार गड राखतात की नाही हे काही तासांमध्ये कळेल. बारामतीमध्ये मतमोजणीला सुरूवात झाली असून युगेंद्र पवारांनी जोरदार सुरूवात केली आहे. युगेंद्र पवार आघाडीवर आहेत. त्यामुळे युगेंद्र पवारांच्या कार्यकर्त्यांमध्ये आनंदाचे वातावरण आहे.

बारामतीमध्ये सध्या मतमोजणी सुरू आहे. पोस्टल मतमोजणीमध्ये युगेंद्र पवार आघाडीवर आहेत तर अजित पवार पिछाडीवर आहेत. त्यामुळे अजित पवार गटाला मोठा धक्का बसण्याची शक्यता आहे. पण अजून संपूर्ण निकाल हाती येणं बाकी आहे. आताच मतमोजणी सुरू झाली आहे. त्यामुळे बारामतीमध्ये कोण विजयी होणार आणि बारामतीचा नवा आमदार कोण ठरणार हे चित्र स्पष्ट होण्यासाठी आता काही तास शिल्लक राहिले आहेत.

बारामती विधानसभा निवडणूक ही शरद पवार यांच्यासोबत अजित पवार यांच्यासाठी खूप प्रतिष्ठेची मानली जाते. अजित पवारांनी शरद पवारांची साथ सोडल्यानंतर राष्ट्रवादी काँग्रेसमध्ये दोन गट झाले आहेत. त्यानंतरची ही विधानसभेची पहिली निवडणूक आहे. त्यामुळे ही निवडणूक दोघांसाठी खूपच महत्वाची आहे. अशामध्ये शरद पवारांनी नातू युगेंद्र पवार याला अजित पवारांविरोधात निवडणुकीच्या रिंगणात उतरवले.

युगेंद्र पवारसाठी शरद पवार, सुप्रिया सुळे आणि रोहित पवार यांनी जोरदार प्रचार केला. संपूर्ण मतदारसंघ पिंजून काढला. तर दुसरीकडे अजित पवारांनी देखील या मतदारसंघामध्ये आपली सत्ता कायम राहण्यासाठी कोणतीही कसर सोडली नाही. अजित पवारांसाठी पत्नी सुनेत्रा पवार, मुलं जय पवार आणि पार्थ पवार यांनी देखील जोरदार प्रचार केला. आता याठिकाणी कोणाचा विजय होत आहे हे लवकरच चित्र स्पष्ट होईल. याकडे संपूर्ण बारामतीकरांचे लक्ष लागले आहे.

महाराष्ट्र विधानसभा निवडणूक निकालांचे ताजे अपडेट इथं वाचा...

Maharashtra All Constituency Assembly Election results Updates