बदलापूर गोळीबार प्रकरणाला नवं वळण लागलं आहे. बदलापूरच्या गोळीबारात शिवसेना पदाधिकाऱ्याचा हात असल्याचा आरोप जखमी अल्ताफ शेखने केला आहे. या शिवसेना पदाधिकाऱ्याने गोळीबाराचा कट रचल्याचं अल्ताफ शेखने म्हटलं आहे. जखमी अल्ताफ शेखच्या आरोपामुळे राजकीय वर्तुळात खळबळ उडाली आहे.

जगदीश कुडेकर असे शिवसेना पदाधिकाऱ्याचे नाव आहे. या प्रकरणात शिवसेनेच्या पदाधिकारी जगदीश कुडेकर यांचा हात असल्याचा आरोप जखमी अल्ताफने केला आहे. तसेच जगदीश कुडेकर यांच्यावर गुन्हा दाखल करून मला न्याय मिळवून देण्याची मागणी अल्ताफने केली आहे.

अल्ताफ शेखने काय म्हटलं?

अल्ताफ शेख म्हटलं की, गोळीबार होण्याआधी शनिवार आणि मंगळवारी दोन वेळा माझं दुकान जाळण्यात आलं होतं, यानंतर जगदीश कुडेकरने मला जीवे मारण्याची धमकी दिली होती. याबाबत मी पोलिसांकडे तक्रार करूनही पोलिसांनी कारवाई केली नाही. अखेर माझ्यावर जगदीश कुडेकरच्या माणसांनी गोळीबार केला.

याप्रकरणी जगदीश कुडेकर याच्यावर गुन्हा दाखल करून मला न्याय मिळवून द्यावा, अशी मागणी अल्ताफ शेखने केली आहे. याबाबत जगदीश कुडेकर यांनी मात्र अद्याप काहीही प्रतिक्रिया दिलेली नाही.

आमदारांच्या बंगल्यासमोर झाला होता गोळीबार

बदलापुरातील किसन कथोरे यांच्या बंगल्यासमोर गुन्हेगारी पार्श्वभूमी असलेल्या अल्ताफ शेखवर चौघांनी गोळीबार केल्याची घटना घडली होती. बदलापूर गावातील आमदार किसन कथोरे यांच्या निवासस्थानाबाहेरील रस्त्यावर गुरुवारी दुपारी हा प्रकार घडला होता. जखमी अल्ताफवर दोन गुन्हे गुन्हे दाखल आहेत. तर आरोपीवर तीन गुन्हे आहेत. बदलापूर गावाकडून बोराडपाड्याकडे जाणाऱ्या रस्त्यावर गोळीबार झाला होता. गोळीबारानंतर अल्ताफला तातडीने एका खासगी रुग्णालयात उपचारासाठी दाखल करण्यात आलं होतं.