संजय सूर्यवंशी, साम टीव्ही

काँग्रेसमध्ये पुन्हा घरवापसी करणार असल्याच्या चर्चांवर भाजपचे राज्यसभा खासदार आणि राज्याचे माजी मुख्यमंत्री अशोक चव्हाण यांनी संतप्त प्रतिक्रिया दिली आहे. नाना पटोले काय माझे मालक आहेत का? मी घरवापसीबाबत कुठे बोललो आहे? याचा एक पुरावा दाखवा, असा सवाल अशोक चव्हाण यांनी केला आहे. त्यांच्या या विधानामुळे राजकीय वर्तुळात चर्चांना उधाण आले आहे.

काँग्रेस पक्ष सोडलेल्या देशातील पाच माजी मुख्यमंत्र्यांची पुन्हा काँग्रेसमध्ये घरवापसी होणार असल्याची चर्चा राजकीय वर्तुळात सुरू आहे. यामध्ये माजी मुख्यमंत्री अशोक चव्हाण यांच्या नावाचाही समावेश असल्याची चर्चा रंगली होती. या पार्श्वभूमीवर काँग्रेसचे ज्येष्ठ नेते नाना पटोले यांनी अशोक चव्हाण यांच्या संभाव्य घरवापसीबाबत भाष्य केले होते. अशोक चव्हाण यांनी महत्त्वाच्या काळात काँग्रेस सोडल्यामुळे राज्यातील काँग्रेस कार्यकर्त्यांच्या मनात त्यांच्याविषयी तीव्र रोष असल्याचे नाना पटोले म्हणाले होते. मात्र, देशातील राजकीय वातावरण बदलत असल्याने अनेक जण काँग्रेसच्या मूळ प्रवाहात येण्यास उत्सुक असल्याचेही त्यांनी सांगितले. अशोक चव्हाण आणि इतर नेत्यांच्या घरवापसीबाबतचा अंतिम निर्णय पक्षाचे हायकमांड घेईल, असे पटोले यांनी स्पष्ट केले होते.

नाना पटोले यांच्या या विधानावर आता अशोक चव्हाण यांनी प्रत्युत्तर दिले आहे. मी काँग्रेसमध्ये परत येणार असल्याचे कधी बोललो आहे? याचा एक पुरावा दाखवा, असे आव्हानच त्यांनी दिले. तसेच, नाना पटोले काय माझे मालक आहेत का? असा सवाल करत त्यांनी या चर्चांवर संतप्त प्रतिक्रिया दिली. दरम्यान, अशोक चव्हाण यांच्या या प्रतिक्रियेमुळे त्यांच्या काँग्रेसमधील संभाव्य घरवापसीच्या चर्चांना फुलस्टॉप मिळाला आहे.