अमर घटारे 
अमरावती : नोकरी लावून देण्याचे आमिष दाखवत अनेकांची फसवणूक झाल्याचे प्रकार समोर आले आहेत. यातच अमरावतीमध्ये शिंदे गटाच्या शहराध्यक्षाने रेल्वे विभागात नोकरी लावून देतो असे आमिष देऊन तब्बल १७ तरुणांची फसवणूक केल्याचे समोर आले आहे. या प्रकरणी फसवणूक झालेल्या तरुणाने दिलेल्या तक्रारीवरून चार जणांविरोधात गुन्हा दाखल करण्यात आला आहे. या प्रकरणी पोलीस तपास करत आहेत. 

अमरावतीच्या अंजनगाव सुर्जी येथे सदरचा प्रकार उघडकीस आला आहे. शिवसेना शिंदे गटाचा पदाधिकारी अर्थात शिंदे गटाचा शहराध्यक्ष असल्याने ओळख असेल यातून तरुणांनी योगेश उर्फ मुन्ना इसोकार याच्यावर विश्वास ठेवला. तसेच योगेश इसोकर याने अनेक तरुणांना गाठत आपली रेल्वेमध्ये ओळख असल्याचे सांगत त्यांना नोकरीला लावून देण्याचे आमिष दाखविले. याकरिता विशिष्ट रक्कम द्यावी लागेल असे सांगत पैशांची मागणी केली. 

१७ तरुणांकडून घेतले दीड कोटी 

योगेश याने सांगितल्यावर तरुणांनी आपल्याला रेल्वेत नोकरी लागेल यावर विश्वास ठेवत पैसे दिले. यात साधारण १७ तरुणांकडून १ कोटी ५६ लाख रुपये हडपल्याचा धक्कादायक प्रकार उघडकीस आला आहे. अनेक दिवस होऊन देखील नोकरी लागत नसल्याने तरुणांनी योगेश यांच्याकडे तगादा लावला. तरी देखील नोकरी लागत नसल्याने या प्रकरणात तरुणाच्या तक्रारीवरून अमरावती ग्रामीण पोलिसांत धाव घेत तक्रार दिली. 

चार जणांविरोधात गुन्हा दाखल 

तरुणाने दिलेल्या तक्रारीवरून अमरावती ग्रामीण पोलीस स्टेशनमध्ये शिवसेना शिंदे गटाच्या शहराध्यक्षासह चार जणांविरुद्ध फसवणुकीचे गुन्हे दाखल केल्याने चांगलीच खळबळ उडालीय. यात शिवसेना शिंदे गटाचा शहराध्यक्ष योगेश उर्फ मुन्ना इसोकार,  श्रीकांत फुलसावंदे, विलास जाधव आणि माँटी उर्फ मेघराजसिंह चव्हाण ठाकूर अशी गुन्हा दाखल झालेल्यांची नावं आहेत. या  प्रकरणात मंगेश वसंतराव हेंड यांच्या तक्रारीवरून अंजनगावसुर्जी पोलिसानी चौघांविरुद्ध गुन्हे दाखल केला आहे.