अमर घटारे  
अमरावती : गेल्या अनेक वर्षांपासून प्रतीक्षेत असलेल्या अमरावतीच्या विमानतळाचे काम पूर्णत्वास आले आहे. त्यामुळे महाराष्ट्र विमानतळ विकास प्राधिकरणाच्यावतीने विमानतळ सुरू करण्याबाबत निर्णय घेण्यात आला असून येत्या ३१ मार्चला अमरावती विमानतळावरून विमान सेवा सुरु करण्यात येत आहे. या निर्णयामुळे अनेक वर्षांची प्रतीक्षा आता संपली आहे.

पश्चिम विदर्भातील अमरावती शहर हे महत्त्वाचे विभागीय मुख्यालय आहे. मात्र या मुख्यालयातुन विमान सेवा अद्याप सुरू नव्हती. दरम्यान अमरावतीच्या विमानतळावरून विमान सेवा सुरू करावी, अशी मागणी गेल्या अनेक वर्षांपासूनची अमरावती व आसपासच्या अकोला, यवतमाळ जिल्ह्यातील नागरिकांची होती. त्यानुसार सप्टेंबर २०२३ मध्ये इंदू कन्स्ट्रक्शन कंपनीने विमानतळाच्या कामाला सुरुवात केली होती. 

अमरावती शहरात विमानतळ बांधकामास सुरवात करण्यात आली होती. मात्र येथील कामाचा वेग मंदावला होता. परंतु विमानतळाचे बांधकाम पूर्ण करण्यासाठी स्थानिक नेत्यांकडून पाठपुरावा सुरु ठेवत आता काम पूर्णत्वास होत आले आहे. विमानतळावरील धावपट्टीचे काम पूर्ण झाले, तर टर्मिनल इमारतीसह अन्य कामे होण्यात आहेत. यामुळे जुलै- ऑगस्टमध्ये विमान सेवा सुरु होण्याचे संकेत होते. परंतु यापूर्वीच विमान सेवा सुरु करण्यात येत आहे.

दरम्यान ऑक्टोबर २०२४ रोजी विमानतळाचे काम पूर्ण झाले. यामुळे आता विमान सेवा सुरु करण्याचा मार्ग मोकळा झाला असून येत्या ३१ मार्चला या विमानतळावरून विमा सेवा सुरू करण्यात येणार असल्याची घोषणा राज्याचे उपमुख्यमंत्री व अर्थमंत्री अजित पवार यांनी केलेली आहे. त्या अनुषंगाने विमानतळावर सर्व सोयी सुविधा तयार करण्यात आल्या असून सुरक्षा यंत्रणा देखील तैनात करण्यात आलेली आहे.