अमर घटारे 

अमरावती : अमरावती शहरात पुन्हा एकदा खुनाच्या घटनेने खळबळ उडाली आहे. तीन महिन्यांपूर्वी कारागृहातून सुटलेल्या तरुणाची निर्घृणपणे हत्या करण्यात आली आहे. अमरावतीच्या वेंकयापुरा पुरा येथे सदरची घटना घडली आहे. सदर घटनेचा तपास करण्यात येत असून सलगपणे दुसऱ्या दिवशी खुनाची घटना घडल्याने अमरावती शहरात खळबळ उडाली आहे. 

अमरावती शहरातील वेंकयापुरा परिसरात घडलेल्या घटनेत ऋषिकेश उमेश मोडक उर्फ गोंडी (वय २६) असे हत्या झालेल्या तरुणाचे नाव आहे. मृत तरुणाच्या डोक्यावर चाकूचे गंभीर घाव करण्यात आलेले आहेत. तसेच त्याचा हात देखील जळालेल्या अवस्थेत आढळून आला आहे. घटनेची माहिती मिळताच पोलिसांनी घटनास्थळी जात पंचनामा केला. तसेच मृतदेह शासकीय रुग्णालयात नेत पुढील तपासाला सुरवात केली आहे. 

तीन महिन्यांपूर्वी सुटला होता कारागृहातून 
मृत ऋषिकेश मोडक हा तीन महिन्यापूर्वीच कारागृहातून सुटला होता. तसेच त्याच्या एमपीडीए सारखे गंभीर गुन्हे देखील दाखल असल्याची माहिती समोर आली आहे. कारागृहातून तीन महिन्यांपूर्वी सुटल्यानंतर त्याची हत्या करण्यात आली आहे. दरम्यान ऋषिकेश मोडक याची हत्या नेमकी कोणत्या कारणातून झाली आहे याचे कारण अद्याप समजू शकलेलं नाही, मात्र या संदर्भातील अधिक तपास फ्रेजरपुरा पोलिस करत आहेत.

सलग दोन घटनांनी शहर हादरले

अमरावती शहरात सलग दोन दिवसात दोन हत्या झाल्याच्या घटना घडल्या आहेत.  अमरावती शहरातील फ्रेजरपुरा पोलीस स्टेशन हद्दीतील वडाळी भागात आज भर दुपारी सराईत गुन्हेगाराची हत्या झाली असून काल देखील एकाची हत्या झाली होती. सलग दोन दिवसात हत्येच्या घटनेने अमरावती शहर हादरले आहे.