अमर घटारे 

अमरावती : पार्टी करण्यासाठी सोबत हॉटेलमध्ये गेले. एकाच टेबलावर बसून दारू घेतली. मात्र दोघांमध्ये काही तरी बिनसले आणि यातून दारूच्या नशेत बारच्या बाहेर येताच चाकूने हल्ला केला. यात एका जणाचा मृत्यू झाल्याची घटना घडली आहे. सदर घटना रहाटगाव राष्ट्रीय महामार्गावर असलेल्या एस ए बार समोर मध्यरात्रीच्या सुमारास घडली असून सीसीटीव्ही कॅमेरात चाकू हल्ला झाल्याचे कैद झाले आहे.

अमरावतीच्या रहाटगाव परिसरातील राष्ट्रीय महामार्ग लगतच्या एस ए बार समोर मध्यरात्री एकाची निर्घृण हत्या केल्याची घटना समोर आली. रामपुरी कॅम्प परिसरात राहणारा राजेश उर्फ हिप्पी टहलराम सुंदरानी (वय ५४) असे मृतकाचे नाव आहे. दरम्यान मृतक राजेश व त्याच्या ओळखीच्या मित्रानी सोबतच बारमध्ये दारू पिण्यासाठी गेले होते. अशात काही कारणावरून बाहेर निघताना मोठा वाद निर्माण झाला. बार समोरच एकाच्या मांडीवर चाकूने वार करून हत्या करण्यात आली. 

पोलिसांकडून पंचनामा 

अचानक घडलेल्या या घटनेने परिसरात खळबळ उडाली आहे. दरम्यान एस ए बार मधील सीसीटीव्ही कॅमेरात घटना कैद झाली आहे. तर घटनेची माहिती मिळताच मध्यरात्री नांदगाव पेठ पोलीस निरीक्षक दिनेश दहातोंडे व पथकाने एस ए बार गाठले. पोलीस पथकाने घटनेचा पंचनामा करण्यात आला. सोबत बारमधील सीसीटीव्ही फुटेजची पाहणी करण्यात आली. या घटनेत नांदगाव पेठ पोलिसांनी बीएनएस कलम अंतर्गत गुन्हा दाखल केला. 

चौकशीसाठी चौघेजण ताब्यात 

तर शनिवारी सकाळी एसीपी शिवाजी बचाटे यांनी सुद्धा घटनास्थळाची पाहणी केली. तर फिंगर प्रिंट पथक फॉरेन्सिक पथक दाखल होऊन घटनेचा तपास करण्यात आला. सोबतच बार मधील लॉजिंग असलेल्या १०२ रूम मध्ये तपास करण्यात आला. रूममध्ये फॉरेन्सिक पथकाने पंचनामा केला असून खोलीत अनेक दारूच्या बॉटल आढळून आल्या. याचा सुद्धा फिंगर प्रिंट पथकाने पंचनामा केला. या प्रकरणात शहर गुन्हे शाखा युनिट एकच्या पथकाने दोघांना चौकशी करिता ताब्यात घेतले. नांदगाव पेठ पोलिसांनी शिवा फुलवाणी, बंटी पवार यांच्या सह अन्य विरोधात गुन्हे दाखल करून प्रकरण चौकशीला सुरुवात करण्यात आली आहेत.