अमर घटारे 

अमरावती : शेतात पिकाची रखवाली करायला गेलेल्या आदिवासी शेतकऱ्याची निर्घृण हत्या करण्यात आल्याची खळबळजनक घटना समोर आली आहे. भातकुली तालुक्यातील गोपगव्हान येथे सदरची घटना घातली असून आरोपींना अटक करेपर्यंत मृतदेह ताब्यात घेणार नसल्याचा इशारा नातलगांनी दिला आहे. 

अमरावती जिल्ह्यातील भातकुली तालुक्यातील गोपगव्हाण शेतशिवारात हि घटना घडली आहे. या घटनेमुळे परिसरात खळबळ उडाली आहे. दरम्यान शेतात लागवड केलेल्या हरभरा पिकाच्या रखवाली करण्यासाठी पारधी आदिवासी शेतकरी सुनील सोळंके (वय ३५) यांचा अज्ञात व्यक्तींनी गळ्यावर धारदार शस्त्राने हल्ला करून निर्घृण खून केला आहे. 

शेतकरी शेतात गेल्यानंतर घटना उघड 

सुनील सोळंके हे रात्री शेतात हरभरा पिकाची राखण करण्यासाठी गेले होते. मात्र सकाळी शेतकरी व शेतमजुर शेतात गेले असताना त्यांना सुनील सोळंके हे रक्तबंबाळ अवस्थेत आढळून आल्यानंतर हि घटना उघडकीस आली. या घटनेबाबत पोलिसांना माहिती देण्यात आली. यानंतर माहिती मिळताच खोलापुरी गेट पोलिसांनी घटनास्थळी दाखल झाले. तपासासाठी फॉरेन्सिक पथकही घटनास्थळी दाखल झाले आहे. 

नातेवाईक संतप्त 

दरम्यान धारदार हत्याराचा वापर झाल्याने ही हत्या अत्यंत निर्दयी पद्धतीने झाल्याचे स्पष्ट होते. मृतकाची पत्नी पंचायत सदस्य असून, या घटनेमुळे गावात खळबळ उडाली आहे. सदरच्या घटनेनंतर नातेवाईक संतप्त होत आक्रमक झाले आहे. आरोपींना अटक करेपर्यंत मृतदेह ताब्यात घेणार नाही; अशी भूमिका नातेवाईकांनी घेतली आहे. तसेच जिल्हा रुग्णालयाबाहेर मोठ्या संख्येने नातेवाईक व गावकरी जमले आहेत.