नेहमीप्रमाणे आश्रमशाळेतील विद्यार्थ्यांनी संध्याकाळचे जेवण केलं. मात्र या जेवणानंतर मुलांना उलटी व मळमळीचा त्रास होऊ लागला. त्यानंतर तेथील शिक्षकांनी सर्व विद्यार्थ्यांना तातडीने रुग्णालयात दाखल केले. विद्यार्थ्यांवर वैद्यकीय उपचार सुरू असून, रुग्णालयाबाहेर पालकांची मोठी गर्दी झाली आहे. या घटनेमुळे आश्रमशाळा परिसरात खळबळ उडाली असून, विद्यार्थ्यांना नेमकी कोणत्या अन्नपदार्थामुळे त्रास झाला, याबाबत प्रशासनाकडून तपास सुरू आहे.

विद्यार्थ्यांना उलट्या आणि मळमळीचा त्रास होऊ लागल्याचं माहिती होताच शिक्षकांनी आणि गावकऱ्यांनी ऑटो, कार, जीप, काळी-पिवळी अशा मिळेल त्या वाहनांतून विद्यार्थ्यांना रुग्णालयात पोहोचवले. घटनेची माहिती मिळताच कृषी उत्पन्न बाजार समितीचे सभापती रोहित राजकुमार पटेल रुग्णालयात दाखल झालेत.

ठाणेदार अवतार सिंग चव्हाण व पोलिसांनी घटनास्थळी आणि रुग्णालयात धाव घेऊन मदतकार्य सुरू केले. शासकीय डॉक्टरांवर उपचाराचा ताण वाढल्याने खाजगी डॉक्टरांनाही पाचारण करण्यात आले. सामाजिक कार्यकर्त्यांनी विद्यार्थ्यांना उचलून वॉर्डपर्यंत पोहोचवत उपचारासाठी मोलाची मदत केली.विद्यार्थ्यांवर युद्धपातळीवर उपचार सुरू असून सर्वांच्या प्रकृतीवर वैद्यकीय पथकाचे लक्ष. विषबाधेचे नेमके कारण अद्याप स्पष्ट झाले नसून प्रशासनाकडून चौकशी सुरू आहे.