अक्षय गवळी 
अकोला : कार्यालयातील महिलेकडे शरीरसुखाची मागणी करणाऱ्या अधिकाऱ्यांवर कारवाई होणे अपेक्षित आहे. या मुद्यावर लक्षवेधीसाठी विधानसभा अध्यक्षांकडे मागणी केली होती. मात्र या संपूर्ण प्रकारणात लक्षवेधी न होण्यासाठी विधानसभा अध्यक्ष मॅनेज झाल्याचा गंभीर आरोप बाळापूरच्या आमदार नितीन देशमुख यांनी विधानसभा अध्यक्ष राहुल नार्वेकर यांच्यावर केला आहे. 

अकोल्यातल्या महाराष्ट्र जीवन प्राधिकरण विभागाच्या कार्यलयात ठाकरे गटाचे आमदार नितीन देशमुख यांचे ठिय्या आंदोलन सुरु केले आहे. गेल्या दोन तासापासून आमदार देशमुख यांचं ठिय्या सुरु असून यावेळी त्यांनी राहुल नार्वेकर यांच्यावर आरोप केला आहे. तसेच विधानसभा अध्यक्ष मॅनेज झाले असावेत; कारण, असे आरोपी असलेले अधिकारीच सांगत असल्याचे स्पष्टपणे देशमुख म्हणाले. 

त्या अधिकाऱ्यांना बडतर्फ करण्याची मागणी 

मूर्तिजापूर येथील जीवन प्राधिकरण कार्यलयातील कंत्राटी कॉम्प्युटर ऑपरेटर महिलेला कार्यालयातील दोन अधिकाऱ्यांनी शरीर सुखाची मागणी केली. महाराष्ट्र जीवन प्राधिकरणाचे मुर्तिजापूर उपविभागीय अधिकारी डि. बी. कपिले आणि शाखा अभियंता राजेंद्र इंगळे या दोघांनाही पदावरून बडतर्फ करण्यात यावं, त्यांच्यावर कठोर कारवाई व्हावी, यासाठी आमदार नितीन देशमुख यांच ठिय्या आंदोलन सुरू आहे. दरम्यान, अध्यक्षांनी लक्षवेधी जाणीवपूर्वक न घेतल्याने आपण आज अधिवेशनाला हजर न राहता, एका बहिणीच्या न्यायासाठी अकोल्यात ठिय्या आंदोलन केल्याचे आमदार नितीन देशमुख म्हणाले.

अधिकाऱ्यांना मतदार संघातील आमदारांचे पाठबळ 
दरम्यान, या संपूर्ण प्रकरणावर महिला कम्प्युटर ऑपरेटर हिने ज्यांच्यावर आरोप केले; त्या कपिले यांच्यामागे मुर्तीजापुर मतदार संघाचे आमदाराचे पाठबळ असल्याचा आरोप केला आहे. आपल्याला वारंवार तक्रारी करूनही पैशांमूळे कुठेच न्याय मिळाला नसल्याचा आरोप पिडीत महिलेने केला.