अकोला : वडिलांचे निधन झाल्‍याने घरातील मंडळी अंत्यविधीसाठी गावाकडे गेले होते. परिवार गेल्याची संधी (Akola News) पाहून चोरट्यांनी घरावर डल्ला मारला. श्रीकांत लड्डा हे १२ एप्रिलला अंत्यसंस्कार करण्याकरता घर बंद करून गेले होते. (Live Marathi News)

अकोल्यातील खदान पोलीस स्टेशनच्या हद्दीतील सहकारनगरात श्रीकांत हरिकिसन लड्डा यांच्या श्रीहरी निवासस्थानावर चोरी झाल्याची घटना नुकतीच समोर आली आहे. श्रीकांत लड्डा हे अमरावती जिल्ह्यातील कोकर्डा या ठिकाणी वडीलांचे निधन झाल्यामुळे घरातील मंडळी अंत्यविधीसाठी (Funeral) गेले होते. श्रीकांत लड्डा हे १२ एप्रिलला अंत्यसंस्कार करण्याकरता घर बंद करून गेले होते. या दरम्‍यान १३ व १४ एप्रिल या दोन दिवसाच्या मध्यरात्री अज्ञात चोरट्यानी घरी कोणी नसल्याचा फायदा घेत घराचा कोंडा तोडून श्रीहरी बंगल्यामध्ये प्रवेश केला.

२५ लाखाचा मुद्देमाल लंपास

दरम्‍यान चोरट्यांनी अंदाजे वीस तोळे सोन्याचे दागिने आणि काही रोकड असा अंदाजे २० ते २५ लाख रुपयांचा मुद्देमाल लंपास केला. घरकाम करणाऱ्या बाईला दरवाजा उघडा आणि तुटलेला असल्याचे लक्षात आल्यानंतर त्यांनी ही माहिती श्रीकांत लड्डा यांना दिली. या घटनेची माहिती खदान पोलीस स्टेशनला दिल्यानंतर पुढील तपास खदान पोलीस सीसीटीव्ही फुटेज तपासून करीत आहेत.