अक्षय गवळी 

अकोला : अकोल्यातून गेलेल्या महामार्गावर आज सकाळी भरधाव ट्रक व प्रवाशी वाहतूक करणाऱ्या चारचाकी गाडीचा भीषण अपघात झाला. या अपघातात सात जण गंभीर स्वरूपात जखमी झाले आहेत. जखमींना लागलीच रुग्णालयात उपचारासाठी दाखल करण्यात आले असून अपघातामुळे महामार्गावरील वाहतूक काही वेळ ठप्प झाली होती. 

अकोल्यातल्या (Akola) राष्ट्रीय महामार्गावरील शिवनी परिसरात हि घटना घडली आहे. सकाळी लोडेड ट्रक व प्रवाशी वाहतूक करणाऱ्या चारचाकी गाडीची सामोरा समोर धडक झाली. हा अपघात (Accident) इतका भीषण होता की ट्रक आणि बोलोरो वाहन रस्त्यावर पलटी झाले. समोरासमोर धडक होऊन झालेल्या अपघातात ट्रकमधील पॅकिंग पेपरचे मोठ्या प्रमाणात नुकसान झाले. तसेच सातजण गंभीर जखमी झाले आहेत. या सातही जखमी रुग्णांवर अकोल्यातल्या शासकीय रुग्णालयात उपचार सुरू आहे. 

महामार्गावर वाहतूक ठप्प 

ट्रक व बोलेरो गाडीचा अपघात झाल्याने दोन्ही गाड्या महामार्गावर पलटी झाल्या होत्या. यामुळे महामार्गावरील दोन्ही बाजूंची वाहतूक ठप्प झाली होती. दरम्यान पोलिसांनी घटनास्थळी येत अपघाती वाहनांना रस्त्याच्या बाजूला करत वाहतुकीचा मार्ग सुरळीत केला.