अकोल्यातून मोठी बातमी समोर आली आहे. अकोला शहरातील कपडा बाजारातील 'जेजे मॉल' मध्ये अग्नितांडव पाहायला मिळाला आहे. आगीचं रौद्ररुप पाहून आजूबाजूच्या लोकांमध्ये भितीचं वातावरण निर्माण झालं होत. काही वेळातच संपूर्ण परिसरात धुराचे लोळ पाहायला मिळाले. या दुर्घटनेत कोणतीही जीवित हानी झाली नसून मोठ्या प्रमाणावर वित्त हानी झाली आहे.

मिळालेल्या माहितीनुसार, आज पहाटे ३ वाजताच्या सुमारास अकोला कपडा मार्केट परिसरातील 'जेजे मॉल'ला भीषण आग लागली. आधी धूर, मग काही क्षणातचं आगीचं रौद्ररुप या ठिकाणी दिसून आले. बघता बघता 'जेजे मॉल' पूर्णतः आगीच्या आटोक्यात आला होता. सुदैवाने या आगीत कोणतीही जीवितहानी झाली नाहीये. मात्र, आगीचे नेमकं कारण अद्याप स्पष्ट झालेले नाही. परंतु शॉर्टसर्किटमुळे या मॉलला आग लागली असल्याचा अंदाज यावेळी घटनास्थळी व्यक्त करण्यात येत होता.

या आगीची माहिती मिळताच अकोला अग्निशमन दल घटनास्थळी दाखल झाले. आणि आगीवर पाण्याचा मारा सुरू केला, तब्बलं दोन ते अडीच तासानंतर आगीवर नियंत्रण आणण्यात अग्निशमन दलाला यश आलं आहे. आग आटोक्यात आणण्यासाठी तब्बल अग्निशामन दलाच्या ५ गाड्या घटनास्थळी दाखल झाल्या होत्या.

अग्निशमन दलाच्या गाड्या घटनास्थळी दाखल होईपर्यँत जेजे मॉलला आगीने घेरलं होत. या दुर्घटनेत ५० ते ६० लाखांच मोठं नुकसान झाल्याचे अनुमान लावले जात आहे. कारण, मॉलमधील पूर्ण फर्निचर, याशिवाय कपडे इतर साहित्य आगीत जळून खाक झाले आहे. सुरुवातीला मॉलच्या वरच्या भागात ही आग लागली होती, त्यानंतर थोड्यावेळात मॉलच्या इतर परिसरात आग पसरली असल्याचे समोर आलं आहे. या मॉल मध्ये आग लागली कशी याचा तपास सुरु आहे.