सुशील थोरात

Ahmednagar News :

पहिली पत्नी हयात असताना घटस्फोट न देता दुसऱ्या लग्नासाठी बोहल्यावर चढण्याच्या तयारीत असलेल्या नवरदेवाला पहिल्या पत्नीने चांगलाच धडा शिकवला आहे. लग्नाची घटका जवळ येत असतानाच वधू-वर गळ्यात हाल घालण्याच्या तयारीत असतानाच पहिल्या बायकोने एन्ट्री केल्याने लग्नात एकच गोंधळ उडाला. अखेर हे बेकायदेशीर लग्न रोखून पतीची वरात थेट पोलीस ठाण्यात गेली.

छत्रपती संभाजीनगर जिल्ह्यातील एका तीस वर्षीय महिलेला पती दुसरं लग्न करत असल्याची माहिती तिला मिळाली. संतापलेल्या पत्नीने आपल्या आई-वडिलांसह आणि बारा वर्षीय मुलासह नगर गाठले. मंगल कार्यालयाचा पत्ता शोधून ती लग्नाच्या काही मिनिटे आधी तेथे पोहोचली. त्यापुढे या लग्नात मोठा राडा झाला. पहिल्या पत्नीने आपल्या नवऱ्याच्या नियोजित वधूला देखील मारहाण केली.

अचानक झालेल्या या प्रकाराने नवीन वधू आणि महिलेचा पती चांगलेच गोंधळून गेले. वऱ्हाडी मंडळींना सुद्धा नेमकं काय सुरु आहेत हेच कळेना. तिथूनच कुणीतरी पोलिसांना फोन केल्यानंतर काही वेळाने पोलीस त्या ठिकाणी पोहोचले आणि सर्व वरात पोलीस स्टेशनला नेण्यात आली.

पोलीस स्टेशनला आल्यानंतर विशाल पवार याच्यावर त्याच्या पहिल्या पत्नीने गुन्हा दाखल केला. कोणताही कायदेशीर घटस्फोट न घेता आणि एक मुलगा असताना सुद्धा आपल्या पतीने दुसऱ्या मुलीबरोबर उपनिबंधक कार्यालयात विवाह करून एका हॉटेलमध्ये लग्न सोहळ्याचे आयोजन केले होते. मात्र आम्ही त्या ठिकाणी वेळेत पोहोचल्याने तो लग्न सोहळा थांबवण्यात आला. मात्र पतीने फसवणूक करुन दुसरे लग्न करण्याचा प्रयत्न केला असल्याबद्दलचा गुन्हा तोफखाना पोलीस स्टेशनमध्ये दाखल करण्यात आला आहे. (Latest Marathi News)

तोफखाना पोलीस स्टेशनमध्ये विशालविरुद्ध भादंवी 494 नुसार गुन्हा दाखल करण्यात आला आहे. या प्रकरणात विशाल पवार हा जालना जिल्ह्यात राहणारा असून तसेच त्याची होणारी नववधू ही सुद्धा जालना जिल्ह्यात राहणारी आहे. मात्र दोघांच्या कुटुंबियांनी जालना आणि छत्रपती संभाजीनगरमध्ये लग्न न करण्याचा निर्णय घेतला. पहिल्या पत्नीपासून लग्न लपवण्यासाठीच हे लग्न अहमदनगरमध्ये करण्याचा प्लान दोन्ही कुटुंबियांचा होता. मात्र पहिल्या पत्नीने तेथे येऊन त्यांचा हा डाव उधळला आहे.