सुशील थोरात 

अहिल्यानगर :  महायुतीकडे पैसा खूप मोठ्या प्रमाणात आहे. हा पैसा गाडीने पोहोचला जातो. गाडीने जमला नाही तर हेलिकॉप्टरनेही पोहोचवला जातो. एवढा पैसा झाल्यावर करणार काय गोडाऊन सुद्धा कमी पडतील अशी परिस्थिती आहे. जे पैसे खाल्ले आहेत, त्यातील पैसे खर्च करण्यात काय हरकत आहे अशी त्यांची मानसिकता आहे; अशी प्रतिक्रिया आमदार रोहित पवार यांनी दिली. 

भाजप (BJP) राष्ट्रीय सरचिटणीस विनोद तावडे हे पैसे वाटत असल्याचा आरोप बहुजन विकास आघाडीकडून करण्यात आला होता. विनोद तावडे यांच्याकडे पैसे सापडलेल्या प्रकरणावर कर्जत- जामखेडचे आमदार रोहित पवार (Rohit Pawar) यांनी प्रतिक्रिया दिली. आमदार पवार यांनी विनोद तावडेंच्या प्रकरणावर भाजपवर निशाणा साधला आहे.

मतांचा बाजार झालाय 

अत्यंत चुकीच्या पद्धतीने ही निवडणूक सुरू असून लोकांच्या स्वाभिमानाचा, लोकांच्या मताचा बाजार झाला आहे. लोकांचा मत विश्वासात घेतलं जात नाही. लोकांचा स्वाभिमान विकत घेतला जात आहे; अशी चर्चा आहे. त्यामुळे येणाऱ्या निवडणुकीत ही अतिशय चिंताजनक बाब असल्याचं आमदार रोहित पवार म्हणाले.