सुशील थोरात 
अहिल्यानगर : जिल्हा रुग्णालयाच्या पोर्टलवर जात परस्पर माहिती भरून अपंगत्वाचे प्रमाणपत्र काढण्यात आल्याचा धक्कादायक प्रकार अहिल्यानगरमध्ये समोर आला होता. या प्रकरणी सहा जणांविरोधात गुन्हा दाखल करण्यात आला होता. यानंतर सदर बनावट प्रमाणपत्र प्रकरणी दोन जणांना पोलिसांनी ताब्यात घेतले आहे.   

अहिल्यानगरमध्ये हा धक्कादायक प्रकार समोर आला होता. यात अहिल्यानगरच्या जिल्हा रुग्णालयातील कर्मचाऱ्यांना हाताशी धरून कोणतीही वैद्यकीय तपासणी न करता तसेच रुग्णालयात नोंद न करता ऑनलाईन पोर्टलवर परस्पर माहिती भरली. यानंतर त्या माहितीच्या आधारे कर्णबधीर असल्याचे बनावट अपंग प्रमाणपत्र मिळवल्याचा धक्कादायक प्रकार उघडकीस आला होता. याबाबत जिल्हा रुग्णालय प्रशासनाने गंभीर दखल घेतली होती. 

सहा जणांविरुद्ध गुन्हा दाखल 

बनावट प्रमाणपत्र प्रकास्नी जिल्हा रुग्णालय प्रशासनाचे डॉ. साहेबराव डवरे यांनी दिलेल्या फिर्यादीवरून प्रसाद संजय बडे, सुदर्शन शंकर बडे, सागर भानुदास केकाण, गणेश रघुनाथ पाखरे यांच्यासह जिल्हा रुग्णालयातील कर्मचारी योगेश बनकर आणि गणेश गोत्राळ या सहा जणांविरोधात गुन्हा दाखल करण्यात आला होता. यापैकी योगेश बनकर याचा मृत्यू झाला आहे. 

दोघांना घेतले ताब्यात 

तसेच सदर प्रकरणातील प्रसाद बडे, गणेश रघुनाथ पाखरे, गणेश गोत्राळ या तीघांनी अटकपूर्व जामीन घेतला आहे. मात्र तोफखाना पोलिसांनी या प्रकरणात सागर भानुदास केकान आणि सुदर्शन बडे या दोघांना अटक केली आहे. या दोघांकडून तपासामध्ये आणखी काही धागेदोरे मिळण्याची शक्यता असल्याची तोफखाना पोलीस स्टेशनचे पोलीस निरीक्षक आनंद कोकरे यांनी दिली आहे.