नागपंचमीच्या आदल्या दिवशी सांगलीतील शिराळेकरांना राज्य सरकारने आनंदाची बातमी दिली आहे. शिराळेकरांना तब्बल २३ वर्षानंतर त्यांना हवी तशी नागपंचमी साजरी करता येणार आहे. याचे कारण म्हणजे सर्वोच्च न्यायालयाकडून नागपंचमीला जिवंत नागांची पूजा करण्यावरची बंदी हटवण्यात आली असून २१ शिराळकरांना नाग पकडण्याची अधिकृत परवानगी देण्यात आली आहे. यामुळे गावातील नागरिकांमध्ये उत्साहाचं वातावरण निर्माण झाले आहे.

सर्वोच्च न्यायालयाच्या निर्देशांनंतर नागपंचमीला जिवंत नागांची पूजा करण्यावर बंदी घालण्यात आली होती. मात्र यावर्षी केंद्र सरकारकडून विशेष परवानगी मिळाल्यामुळे हा ऐतिहासिक आणि पारंपरिक सोहळा नव्या उत्साहात साजरा होणार आहे. सांगलीतील शिराळेकरांना तब्बल २३ वर्षांच्या प्रतीक्षेनंतर यंदाच्या नागपंचमीला पुन्हा एकदा जिवंत नागांचे दर्शन लाभणार आहे.

विशेष म्हणजे यंदाच्या नागपंचमीपूर्वी २१ शिराळकरांना नाग पकडण्याची आणि त्यांचे संवर्धन करण्याची अधिकृत परवानगी देण्यात आली आहे. ही परवानगी शैक्षणिक अभ्यास, सर्पसंवर्धन, आणि पारंपरिक परंपरा जपण्यासाठी दिली गेली आहे. यानिमित्ताने शिराळ्यातील अंबाबाई मंदिर परिसरात भाविकांची प्रचंड गर्दी उसळली आहे.

शिराळ्यात विविध ठिकाणी नागांविषयी माहिती देणारे प्रबोधनात्मक कार्यक्रम आयोजित करण्यात आले आहेत. नागाचे महत्त्व, पर्यावरणीय भूमिकेबाबत जनजागृती केली जात आहे. त्यामुळे या परंपरेत केवळ धार्मिक नव्हे तर शास्त्रीय दृष्टिकोनही समाविष्ट झाला आहे. शिराळ्यातील नागपंचमी ही महाराष्ट्रातील एक वैशिष्ट्यपूर्ण परंपरा मानली जाते. यंदा केंद्राच्या परवानगीमुळे हा सोहळा अधिक पारंपरिक, शास्त्रीय आणि सश्रद्ध पद्धतीने साजरा होत असल्याने शिराळ्यात आनंदाचे आणि समाधानाचे वातावरण आहे.