औरंगाबाद : शेतकऱ्यांच्या मालाला हमी भावापेक्षा कमी भाव दिला, तर व्यापारी किंवा आडत दुकानदारांना जेलची हवा खावी लागणार आहे. अतिवृष्टी आणि पुरातून कसे- बसे सावरलेल्या शेतकऱ्यांना अडचणीत आणल्यास सरकार कुणालाही सोडणार नाही, असा इशारा महसूल राज्यमंत्री अब्दुल सत्तार यांनी खाजगी व्यापारी आणि आडत दुकानदाराना दिला आहे.

हे देखील पहा-

सध्या बाजारामध्ये सोयाबीन, मका, कापूस ही नगदी पिके बाजारात विक्रीसाठी शेतकरी आणत आहेत. मात्र, खाजगी व्यापारी, दुकानदार हे वाटेल त्या भावात खरेदी करत असल्याची तक्रार शेतकऱ्यांची आहे. आर्थिकदृष्ट्या अडचणीत सापडलेल्या शेतकऱ्यांच्या मालाला भाव मिळत नसल्यामुळे शेतकरी अधिक अडचणीत सापडलेला आहे.

काही दिवसापूर्वी १० हजारावर पोहोचलेलं सोयाबीन आता ४ हजार रुपयांमध्ये खरेदी केले जात आहे. ही स्थिती कापूस आणि मकाची झाली आहे. त्यामुळे आधारभूत किंमत म्हणजे हमीभावापेक्षा कमी दराने शेतकऱ्यांच्या मालाची खरेदी केल्यास महाराष्ट्र सरकारने जो कायदा केला आहे, त्यानुसार दुकानदार, आडत व्यापारी यांच्यावर कारवाई केली जाणार आहे.

शेतकऱ्यांनी अडत व्यापारी किंवा दुकानदाराने हमीभावापेक्षा कमी दराने जर खरेदी केली असेल, तर त्याची पावती दुकानदाराचे नाव ही माहिती द्यावी. त्यानंतर थेट त्या दुकानदार व्यापाऱ्यांवर गुन्हे दाखल करण्यात येणार आहेत, असे आवाहनही महसूल राज्यमंत्री अब्दुल सत्तार यांनी यावेळी केलं आहे.

Edited By- Digambar Jadhav