राजस्थानमधील कोटा येथे रविवारी सकाळी एका निर्माणाधीन बोगद्यात मोठी दुर्घटना घडली. बोगद्याचा काही भाग कोसळला आणि ढिगाऱ्याखाली दबल्याने एका कामगाराचा मृत्यू झाला तर तीन जण जखमी झाले. हा अंडरकन्स्ट्रक्शन बोगदा दिल्ली-मुंबई एक्स्प्रेसवेचा भाग आहे. जखमींना उपचारासाठी कोटा शहरातील रुग्णालयात दाखल करण्यात आले आहे. रामगंज मंडईतील मोडक परिसरात बांधण्यात येत असलेल्या बोगद्यात हा अपघात झाला. मिळालेल्या माहितीनुसार, अपघात झाला त्यावेळी कामगार बोगद्यात काम करत होते. कामगारांनी ढिगाऱ्याखाली दबलेल्या सहकाऱ्यांना बाहेर काढले.

बाहेर काढण्यात आलेल्या कामगारांपैकी ३ जणांची प्रकृती चिंताजनक असल्याचे सांगण्यात येत आहे, जखमींना उपचारासाठी कोटा शहरातील रुग्णालयात दाखल करण्यात आले आहे. अपघाताची माहिती मिळताच स्थानिक पोलीस आणि NHAI अधिकारी घटनास्थळी पोहोचले. NHAI नुसार, दिल्ली-मुंबई द्रुतगती मार्गावर मुकुंदरा व्याघ्र प्रकल्पाजवळील टेकड्यांखाली 4.9 किमी लांबीचा 8-लेन बोगदा तयार केला जात आहे.

डॉक्टरांनी उत्तराखंडचे रहिवासी समशेर सिंग यांना मृत घोषित केले. पोलिसांनी मृताच्या नातेवाईकांना माहिती दिली आहे. या अपघातात ठेकेदाराचा निष्काळजीपणा झाल्याचे बोलले जात आहे. कोणत्याही सुरक्षा उपकरणाशिवाय कामगारांना कामावर ठेवण्यात आल्याचे सांगण्यात येत आहे. सध्या अपघाताचा तपास सुरू आहे.

हा बोगदा ध्वनीरोधक असेल. म्हणजे तेथून जाणाऱ्या वाहनांचा आवाज बाहेर येणार नाही, त्यामुळे वन्यप्राण्यांना कोणताही त्रास होणार नाही. हा बोगदा ऑस्ट्रेलियन अभियंत्यांच्या देखरेखीखाली अत्याधुनिक तंत्रज्ञानाने बांधला जात आहे, ज्याच्या बांधकामासाठी अंदाजे 1200 कोटी रुपये खर्च येणार आहे. 2025 पर्यंत पूर्ण करण्याचे उद्दिष्ट ठेवण्यात आले आहे. बोगद्याचा 3.3 किमी भाग डोंगराखाली आणि 1.6 किमी बाहेरील भाग काँक्रीट आणि सिमेंटचा बनविला जाईल.