Kalamnuri Bus Accident : हिंगोली मध्ये सलग दुसऱ्या एसटी महामंडळाच्या बसचा अपघात झाला आहे. काल हिंगोली परभणी महामार्गावर सकाळी पाच वाजता अपघात झाला होता त्यानंतर आज पुन्हा हिंगोली नांदेड राष्ट्रीय महामार्गावरील मसोड पाटीवर कळमनुरी आगाराची बस उलटून अपघात झाला. या बस मध्ये 28 प्रवासी प्रवास करत असल्याची माहिती मिळाली असून, हे सर्व प्रवासी हिंगोली व कळमनुरी तालुक्यातील रहिवासी आहेत.

यामध्ये शाळकरी विद्यार्थिनीसह सात ते आठ प्रवासी जखमी झाले आहेत. या घटनेची माहिती मिळताच कळमनुरी पोलिसांनी तातडीने घटनास्थळी धाव घेत, जखमींना कळमनुरीच्या रुग्णालयात उपचारासाठी दाखल केले आहे.

पोलिसांनी दिलेल्या माहितीनुसार, बस समोरील भागात असलेला लोखंडी पाटा तुटल्याने, चालकाचे बसवरील नियंत्रण सुटल्याने बस उलटली आणि हा अपघात झाला. यामध्ये बसचे देखील मोठ्या प्रमाणात नुकसान झाले आहे. अपघात झाला त्यावेळी बसमध्ये 28 प्रवासी प्रवास करत होते. त्यापैकी ८ जण जखमी आहेत. जखमींना कळमनुरीच्या रुग्णालयात उपचारासाठी दाखल केले आहे.