राज्यात बिटकॉइनचा मोठा घोटाळा उघडकीस आला आहे. तब्बल ६६०० कोटी रूपयांचा घोटाळा झाला असल्याची माहिती समोर आली आहे. पुणे, नांदेड, कोल्हापूरसह, दिल्ली आणि बंगळुरू अशा ६० शहरांमध्ये सीबीआयनं देशभरात छापेमारी केली. या प्रकरणी केंद्रीय गुन्हे अन्वेषण विभागाने मोठी कारवाई केली असून, या कारवाईत महत्त्वाचे डिजिटल पुरावे हाती लागल्याचा दावा विभागाच्या प्रवक्त्यांनी केला आहे.

मे. व्हेरिएबल टेक प्रा.लि. या कंपनीची स्थापना अमित भारद्वाज याने केली होती. कंपनीच्या गेन बिटकॉइनमध्ये गुंतवणूक केल्यास महिन्याकाठी १० टक्के परताव्याचे प्रलोभन दाखवले. २०१७ मध्ये या कंपनीचं जाळं पसरत गेलं. हजारो गुंतवणूकदारांनी यात गुंतवणूक केली.

मात्र, काही काळानंतर गुंतवणूदारांना परतावा देणं थांबविले. नंतर फसवणूक झाल्याचं समजताच अमितविरूद्ध गुन्हा दाखल करण्यात आला. राज्यात एकट्या नांदेडमध्ये बिटकॉइनच्या माध्यमातून ५०० कोटी रूपयांची उलाढाल झाल्याची माहिती समोर आली आहे. मात्र, नंतर अमितने फसवणूक करून दुबईत पळ काढला. दरम्यान, कंपनीच्या संचलकांनी देशभरातून जमा झालेले ६६०६ कोटी रूपये हे विविध मार्गाने आपल्या खात्यांमध्ये वळवले.

शिल्पा -राजवर कारवाई

मागील वर्षी १८ एप्रिल रोजी अभिनेत्री शिल्पा शेट्टी आणि राज कुंद्रा यांच्यावर ईडीनं कारवाई केली होती. ईडीनं कारवाई करत २७ कोटी ७९ लाख रूपयांची मालमत्ता जप्त केली होती. बिटकॉइनमधून कमावलेल्या पैशांतून कुंद्रा याने ही मालमत्ता खरेदी केल्याचा दावा ईडीनं केलाय. त्यातून ही जप्तीची कारवाई झाली होती.