Bhandara Latest News: भंडारा जिल्ह्यातून एक दुर्देवी घटना समोर आली आहे. सोसाट्याचा वारा सुरू असताना किराणा दुकानात खाऊ आणण्यासाठी निघालेल्या एका ३ वर्षीय चिमुकलीच्या अंगावर भिंत कोसळली. या घटनेत तिचा दुर्देवी अंत झाला. जिह्यातील लाखांदूर तालुक्यातील सोनी गावात ही दुर्देवी घटना घडली. देविका प्रकाश दिघोरे ( वय 3 वर्ष) असे मृत्युमुखी पडलेल्या चिमुकलीचे नाव आहे. या घटनेनं परिसरातून हळहळ व्यक्त होत आहे. (Breaking Marathi News)

मिळालेल्या माहितीनुसार, लाखांदूर तालुक्यातील सोनी येथील मृतक देविका गावातीलच एका किराणा दुकानात खाऊ खरेदी करण्यासाठी जात होती. यावेळी अचानक वादळीवारा सुरू झाला. (Latest Marathi News)

या वाऱ्यामुळे रस्त्यालगत असलेल्या शेषराव ऋषी मेघराज यांच्या घराची मातीची भिंत तिच्या अंगावर कोसळली. यात ती गंभीररीत्या जखमी झाली. दरम्यान, ही घटना नागरिकांच्या लक्षात येताच त्यांनी तात्काळ विटा बाजूला सारत जखमी देविकाला बाहेर काढलं.

त्यानंतर तिला तातडीने उपचारासाठी स्थानिक लाखांदूर (Bhandara) येथील ग्रामीण रुग्णालयात दाखल केले. मात्र उपचारापूर्वीच वैद्यकीय अधिकाऱ्यांनी देविकाला मृत घोषित केले. या घटनेची माहिती स्थानिक लाखांदूर पोलिसांना मिळताच त्यांनी तातडीने घटनास्थळी धाव घेतली. पोलिसांनी घटनेचा पंचनामा करीत मृतदेह शवविच्छेदनासाठी पाठविला आहे. या घटनेनं परिसरातून मोठी हळहळ व्यक्त होत आहे.

Edited by - Satish Daud