नंदुरबार : रानात शेळ्या चारण्यासाठी गेलेल्या तरुणीचा विजेचा शॉक लागून जागीच मृत्यू झाल्याची घटना घडली आहे. जिल्ह्यातील धडगाव तालुक्यातील आचपा शिवारात ही दुर्देवी घटना घडली आहे. आरती जिऱ्या पावरा (वय 27) असं मृत्युमुखी पडलेल्या तरुणीचे नाव आहे. आरती तिनसमाळ रस्त्यावर असलेल्या डोंगरात बकऱ्या चारण्यासाठी गेली होती. त्यावेळी ही घटना घडली. (Nandurbar Latest Marathi News)

मिळालेल्या माहितीनुसार, धडगाव तालुक्यातील आचपा येथील जिऱ्या विल्या पावरा यांची 27 वर्षीय मुलगी आरती ही तिनसमाळ रस्त्यावर डोंगरदऱ्यात बकऱ्या चारायला गेली होती. त्यावेळी वादळी वाऱ्यासह पाऊस झाल्याने विजेच्या तारा तुटून जमीनीवर पडल्या होत्या.अशात आरती हिचा या तुटलेल्या ताराला स्पर्ष झाला आणि तिला विजेचा जोरदार धक्का बसला.

विजेचा जोरदार धक्का बसल्याने आरती हिचा जागीच मृत्यू झाला. या घटनेची माहिती मिळताच परिवार व नातेवाईकांनी घटनास्थळी धाव घेत आक्रोश केला. याबाबत मुलीचे वडील जिऱ्या पावरा यांच्या खबरी वरून धडगाव पोलीस ठाण्यात अकस्मात मृत्यूची नोंद करण्यात आली आहे. मयत मुलीच्या परिवाराला शासनाने योग्य ती मदत करावी अशी मागणी केली आहे.