Dhule Container Accident: धुळ्यातल्या मुंबई- आग्रा महामार्गावरील पळासनेर गावाजळ भीषण अपघाताची (Mumbai-Agra Highway Accident) घटना घडली. या अपघाताचा थरकाप उडवणारा व्हिडिओ (Dhule Accident CCTV Video) समोर आला आहे. या अपघातामध्ये भरधाव कंटेनर थेट हॉटेलमध्ये घुसला. या कंटेनरखाली चिरडून १३ जणांचा मृत्यू झाला. तर २० ते २५ जण जखमी झाले आहेत. हा भीषण अपघात सीसीटीव्हीत कैद झाला आहे.

पळासनेर येथील मध्यप्रदेश राज्याच्या बॉर्डरवर मंगळवारी दुपारी बाराच्या वाजताच्या सुमारास हा भीषण अपघात झाला. भरधाव कंटेनरचा अचानक ब्रेक फेल झाला. त्यानंतर कारचा जोरदार धडक देत हा कंटेनर थेट रस्त्याच्या शेजारी असलेल्या हॉटेलमध्ये घुसला. हा अपघात इतका भीषण होता की कंटेनर आणि कारचा अक्षरश: चुराडा झाला आहे.

या अपघाताचा जो सीसीटीव्ही व्हिडिओ समोर आला आहे त्यामध्ये दिसत आहे की, मुंबई -आग्रा महामार्गावर ट्रक उभा आहे. त्याबाजूने एक पांढऱ्या रंगाची कार जात आहे. त्याचवेळात पाठीमागून भरधाव वेगात आलेल्या कंटेनरने कारला जोरदार धडक दिली. या धडकेमध्ये कारचे तुकडे तुकडे होऊन ती फेकली जाते. त्यानंतर हा कंटेनर थेट हॉटेलमध्ये घुसतो.

अवघ्या काही सेकंदातच होत्याचे नव्हते झाले. या भीषण अपघातामध्ये ५ जणांचा जागीच मृत्यू झाला. तर ८ जणांचा उपचारादरम्यान मृत्यू झाला. या अपघातामधील मृतांचा आकडा आणखी वाढण्याची शक्यता आहे. अपघातातील जखमींवर शासकीय आणि खासगी रुग्णालयात उपचार सुरु आहेत. रुग्णालयाबाहेर जखमी आणि मृतांच्या नातेवाईकांनी मोठी गर्दी केली आहे. हा अपघात इतका भीषण होता की कंटेनर आणि कारचा चक्काचूर झाला आहे. धुळे पोलिसांकडून या अपघाताचा तपास सुरु आहे.