साऱ्या राज्याचं लक्ष लागलेल्या माहीमच्या मैदानात सरवणकरांनी आपली उमेदवारी कायम ठेवलीय. त्यामुळे आता माहीमचा सामना तिंरगी होणार आहे. राज ठाकरेंचा मुलगा अमित पहिल्यांदाच निवडणुकीच्या रिंगणात उतरले आहेत. त्यामुळे सदा सरवणकरांनी उमेदवारी मागे घ्यावी यासाठी महायुतीनं जोरदार प्रयत्न केले होते. मात्र आमदार आणि वशिंदे गटाचे उमेदवार सदा सरवणकरांनी सर्वांची मागणी धुडकावून लावली. एवढंच नव्हे तर माहीमच्या समीकरणात अमित ठाकरे निवडून येणं अवघड असल्याचा दावाही केला.

विशेष म्हणजे सरवणकरांनीच राज ठाकरेंची भेट घेण्यासाठी थेट शिवतीर्थ गाठलं. मात्र राज ठाकरेंनी भेट नाकारली. तर हाकेच्या अंतरावर असलेल्या सरवणकरांनी भेट घेण्यासाठी एवढे दिवस का लावले? असा सवाल करत हा स्टंट असल्याचा आरोप मनसेनं केलाय. माहिम मतदारसंघातून सदा सरवणकरांनी आत्तापर्यत तीन वेळा विधानसभा निवडणुकीत विजय मिळविला आहे. 2004, 2014 आणि 2019मध्ये त्यांना माहीमचा गड राखलाय.

2024 च्या विधानसभेला माहिमध्ये तिरंगी लढत होणार आहे. चार दशके जनतेसाठी दिलीस राजपुत्रासाठी माघार घेऊ नकोस तू, असे बाळासाहेब ठाकरेंचा फोटो असलेले बॅनर माहिमध्ये झळकले आहेत. तर अमित ठाकरेंनी घरोघरी जाऊन आपला प्रचार सुरु केला आहे. माहिमची जनता आता अनुभवी सरवणकरांच्या पाठिशी उभं राहून त्यांच्या विजयाची हॅटट्रीक करणार की नव्या दमाच्या राजपुत्राला संधी देणार याची उत्सुकता आहे. ठाकरे गटाचे महेश सावंत यांचीही या मतदारसंघात ताकद असल्यानं तिरंगी लढतीत कोण बाजी मारणार आणि माहिमचा विजयाचा हलवा कोण खाणार ? याकडे सर्वांचं लक्ष आहे.