Pune Assembly Election Results: राज्यात विधानसभा निवडणूकांचा निकाल अखेर लागला आहे. राज्यात पुन्हा महायुतीचं सरकार येणार असून आज शपथविधी होणार आहे. अशातच पुणे जिल्ह्यात आमदारांमध्ये चार नवीन चेहरे समोर आले आहेत. याशिवाय जिल्‍ह्यात तीन माजी आमदारांना पुन्‍हा विधानसभेची संधी मिळालीये. जिल्ह्यात 21 पैकी 14 विद्यमान आमदारांना पुन्हा संधी मिळाल्याचं चित्र आहे.

नव्‍या चार चेहऱ्यांमध्ये कसबा पेठ मतदारसंघात भाजपचे हेमंत रासने, खेडमध्ये शिवसेना (उद्धव बाळासाहेब ठाकरे) पक्षाचे बाबाजी काळे, शिरूरमध्ये राष्ट्रवादी काँग्रेसचे माउली कटके, भोरमध्ये शंकर मांडेकर यांचा समावेश आहे.

माजी आमदार असलेले जुन्नरमधून अपक्ष शरद सोनवणे, पुरंदरमध्ये शिवसेनेचे विजय शिवतारे, वडगाव शेरीमधून बापूसाहेब पठारे हे या निवडणुकीत विजयी झाले आहेत.

माजी आमदार असलेले जुन्नरमधून अपक्ष शरद सोनवणे, पुरंदरमध्ये शिवसेनेचे विजय शिवतारे, वडगाव शेरीमधून बापूसाहेब पठारे हे या निवडणुकीत विजयी झाले आहेत.

पुण्यातही भाजप सर्वात मोठा पक्ष

पुणे शहर आणि जिल्ह्यामध्ये भाजप सर्वांत मोठा पक्ष ठरला आहे.पुण्यात 21 पैकी नऊ जागा त्यांनी जिंकल्या आहेत. त्या खालोखाल राष्ट्रवादी काँग्रेसला एकूण ८ जागा मिळाल्या आहेत.

शिवसेना उद्धव बाळासाहेब ठाकरे गटाला खेडमध्ये बाबाजी काळे यांच्यामुळे केवळ एक जागा मिळालीये. राष्ट्रवादी काँग्रेस शरदचंद्र पवार पक्षाला वडगाव शेरीमध्ये बापूसाहेब पठारे, त्याचबरोबर शिवसेनेचे विजय शिवतारे हे पुरंदरमधून, तर जुन्नरमध्ये शरद सोनवणे हे अपक्ष विजयी झाले आहेत.

जिल्ह्यामध्ये काँग्रेसचा भोपळा

मावळत्या विधानसभेमध्ये काँग्रेसचे जिल्ह्यातून तीन आमदार होते. संग्राम थोपटे, संजय जगताप आणि रवींद्र धंगेकर या काँग्रेसच्या तीनही आमदारांना या निवडणूकीमध्ये पराभव पत्करावा लागला. त्याचप्रमाणे एका अपक्षाबरोबर शिंदे गटाचा देखील पुणे जिल्ह्यात एक आमदार निवडून आला आहे.

सात विद्यमानांना पराभवाचा धक्‍का

मुख्य म्हणजे जिल्ह्यातील एकूण ७ विद्यमान आमदारांना पराभव पत्करावा लागला. यामध्ये राष्ट्रवादी काँग्रेसचे जुन्नरचे अतुल बेनके, वडगाव शेरीचे सुनील टिंगरे, काँग्रेसचे भोरमधील संग्राम थोपटे , खेडचे दिलीप मोहिते आणि पुरंदर मधील संजय जगताप त्याचबरोबर राष्ट्रवादी काँग्रेस शरदचंद्र पवार पक्षाचे शिरूरचे अशोक पवार आणि काँग्रेसचे रवींद्र धंगेकर हे पराभूत झाले आहेत.