पराभव समोर दिसताना आज ठाकरे गटाने आमचा पक्ष फोडला. वरळीत फोडाफोडीचं आणि खोक्याचं राजकारण सुरू झालं आहे. उद्यापासून कोणत्याही पक्षावर फोडाफोडीचा आरोप लावू नका, अशी टीका शिंदे गट शिवसेनेचे नेते मिलिंद देवरा यांनी केलीय. ऐन निवडणुकीच्या काळात वरळी विधानसभा मतदारसंघात शिंदे सेनेला धक्का मिळालाय. वरळीत आदित्य ठाकरे यांच्यासमोर मनसेचे संदीप देशपांडे आणि शिवसेना शिंदे गटाचे मिलिंद देवरा यांचे आव्हान आहे.

आदित्य ठाकरेंना पराभूत करण्यासाठी शिंदे गट आणि मनसेकडून जोरदार तयारी केली जातेय. मुख्यमंत्री एकनाथ शिंदे आणि राज ठाकरे यांनी या मतदारसंघात मोठी ताकद लावलीय. अशातच शिवसेना शिंदे गटाच्या पदाधिकाऱ्यांनी ठाकरे गटात प्रवेश केला असून हा शिंदेंच्या शिवसेनेला मोठा धक्का आहे.

या पक्षफोडाफोडीवर शिवसेनेचे उमेदवार मिलिंद देवरा संतापले आहेत. त्यांनी संतापात एक्सवर पोस्ट करत ठाकरे गटावर जोरदार टीका केलीय. यापुढे कोणीही कोणत्याही पक्षावर फोडाफोडीचा आरोप करू नये. पराभव दिसत असल्यानेच ठाकरे गटाने आमचा पक्ष फोडल्याची टीका देवरा यांनी केलीय.

पन्नास खोके वरळी ओके?

वरळीत फोडाफोडीचं आणि खोक्याचं राजकारण सुरु झालं आहे. पराभव समोर दिसताना आज UBT नी आमचा पक्ष फोडला. २०१९ साली त्यांनी राष्ट्रवादी काँग्रेस पक्षाचे मुंबई अध्यक्ष फोडले, काँग्रेस पक्षाचे कार्यकर्ते फोडले आणि आज त्यांनी शिवसेनाही फोडली. उद्यापासून कोणत्याही पक्षावर फोडाफोडीचा आरोप लावू नका. फोडाफोडी करण्याऐवजी जर वरळीचा विकास केला असता तर आज ही वेळ आली नसती. अशा राजकारणाचा परिणाम निवडणुकीत नक्कीच होईल. UBT मोठ्या मताधिक्याने पराभूत होईल. पन्नास खोके वरळी ओके? असं मिलिंद देवरा म्हणालेत.

ऐन निवडणुकीत मुख्यमंत्री एकनाथ शिंदे यांच्या शिवसेनेला वरळीत मोठा धक्का बसलाय. वरळीतील शिंदे गटाच्या शाखाप्रमुखांसह पदाधिकाऱ्यांनी आदित्य ठाकरेंच्या उपस्थितीत ठाकरे गटात प्रवेश केलाय. तीन शाखाप्रमुखांसह पदाधिकाऱ्यांनी निवडणूक काळात साथ सोडल्याने वरळीत शिंदे गटाला मोठा हादरा बसलाय. मातोश्री येथे पक्षप्रवेशानंतर आदित्य ठाकरे यांनी पदाधिकाऱ्यांचे स्वागत करत मुख्यमंत्री शिंदेंवर टीका केली.