Vishal Patil News:

सांगलीत विशाल पाटलांनी बंड कायम ठेवल्यामुळे आता सांगलीत तिरंगी लढत होणार आहे. कोणत्याही आमिषाला बळी पडणार नाही, असा विश्वास विशाल पाटलांनी कार्यकर्त्यांना दिलाय. त्यामुळे महाविकास आघाडीची अडचण चांगलीच वाढलीय.

काँग्रेसचे बंडखोर उमेदवार विशाल पाटील यांनी आपलं बंड कायम ठेवलंय. त्यांनी आपला उमेदवारी अर्ज मागे घेतलेला नाहीये. त्यामुळे मविआच्या अडचणीत चांगलीच वाढ झालीय. शेवटच्या क्षणी विधानपरिषद किंवा राज्यसभा सदस्यत्वाची ऑफर स्वीकारून ते आपलं बंड मागे घेऊ शकतात अशी चर्चा होती. मात्र विशाल पाटलांनी माघार न घेतल्यामुळे आता सांगलीच्या रिंगणात तीन पाटलांची लढत होणार आहे..

दरम्यान, विशाल पाटलांना लिफाफा चिन्ह मिळाल्यानंतर कार्यकर्त्यांनी जोरदार जल्लोष केल्याचं पाहायला मिळालं.. विशाल पाटलांच्या बंडखोरीमुळे ठाकरे गटाच्या चंद्रहार पाटलांची मत विभागली जाणार आहेत.

'मशाल' विरूद्ध विशाल

2019च्या निवडणुकीत विशाल पाटलांनी स्वाभिमानी संघटनेच्या तिकिटावर निवडणूक लढली होती. यावेळी विशाल पाटलांना 3 लाख 44 हजार 643 मतं मिळवली होती. वंचितच्या तिकीटावर गोपींचद पडळकर यांना मिळालेली 3 लाख मतं निर्णायक ठरली होती.

मविआने एकच उमेदवार दिला असता भाजपला ही निवडणूक सोपी नव्हती. मात्र विशाल पाटलांमुळे मतविभागणीचा फटका काँग्रेसला बसणार आहे. महाविकास आघाडीकडून चंद्रहार पाटील, भाजपकडून खासदार संजय काका पाटील, आणि अपक्ष म्हणून काँग्रेसचे विशाल पाटील हे निवडणुकीच्या रिंगणात असणार आहेत. विशाल पाटील यांचे मन वळवण्यात काँग्रेस नेत्यांना अपयश आलंय. त्यामुळे सांगलीच्या लढतीचे पडसाद इतर मतदारसंघात उमटणार का हे पाहणं महत्त्वाचं ठरेल.