Raj Thackeray And PM Narendra Modi Rally In Shivaji Park :

राज ठाकरे आणि पंतप्रधान मोदी एकाच मंचावर येण्याची शक्यता आहे. येत्या १७ मे रोजी मुंबईच्या शिवाजी पार्कात पंतप्रधान मोदी आणि राज ठाकरेंची तोफ धडाडणार, अशी माहिती सूत्रांनी दिलीये. मुंबईतील सहा जागांसाठी शिवाजी पार्कात जाहीर सभा होणार आहे. दरम्यान राज ठाकरे आणि नरेंद्र मोदी विरोधक आणि उद्धव ठाकरेंवर काय टीका करणार हे पाहणं महत्त्वाचं ठरणार आहे. पाहुयात हा रिपोर्ट.

मुंबईतील महायुतीच्या सहा लोकसभा उमेदवारांसाठी स्वत: पंतप्रधान नरेंद्र मोदी शिवतीर्थावर सभा होणार आहे. १८ मे रोजी प्रचाराच्या तोफा थंडावतील. त्याआधी १७ मे रोजी पंतप्रधान नरेंद्र मोदी शिवतीर्थावर सभा घेणार आहेत. दरम्यान मोदींच्या सभेला मनसेप्रमुख राज ठाकरे देखील उपस्थित राहणार असल्याची माहिती समोर आलीय.

राज ठाकरे महायुतीसाठी ४ ते ५ सभा घेणार आहेत. ४ मे ला सिंधुदुर्गात नारायण राणेंसाठी पहिली सभा होणार आहे. याशिवाय ठाणे आणि कल्याणमध्ये राज ठाकरेंची सभा होण्याची शक्यता आहे. तर १७ मेला मुंबईतील शिवतिर्थावर मोदींसोबत प्रचारसभांची सांगता होणार आहे.

राज ठाकरेंनी महायुतीसाठी सभा घेण्यावरून अनिल परबांनी निशाणा साधलाय. मला माझ्या कडेवर दुसऱ्याची पोरं खेळवायची नाहीत असं जाहीर सभेतून सांगणारे राज ठाकरे आता कुणाची पोरं खेळवणार आहेत असा सवाल अनिल परबांनी केलाय. दुसरीकडे ठाणे आणि कल्याणच्या सभेसाठी शिंदे गटाकडून राज ठाकरेंची सभांची मागणी करण्यात आलीय. शिंदे गटाचे उमेदवार श्रीकांत शिंदे आणि नरेश म्हस्के यांनी राज ठाकरेंची भेट घेऊन सभेची विनंती केलीय.

लोकसभा निवडणुकीसाठी राज ठाकरेंनी पंतप्रधान नरेंद्र मोदींना बिनशर्त पाठिंबा दिला. यानंतर पहिल्यांदाच राज ठाकरे आणि नरेंद्र मोदींची भेट होतेय. मुंबई कायमच शिवसेनेचा बालेकिल्ला राहिलाय. उद्धव ठाकरेंविरोधात पंतप्रधान मोदी स्वत; मुंबईच्या मैदानात उतरलेत. उद्धव ठाकरेंविरोधात राज ठाकरेही मोदींना बळ देणार आहेत. म्हणूनच मुंबईकरांसाठी आणि महाराष्ट्रासाठी मोदी- ठाकरेंची ही सभा ऐतिहासिक ठरणार आहे.