मुंबई: लोकसभा निवडणुकीच्या मतदानाचा अखेरचा टप्पा पार पडल्यानंतर आज संध्याकाळपासून एक्झिट पोल अंदाज जारी केले जात आहेत. अनेक वृत्तवाहिन्यांसह सामवरही लोकसभा निवडणुकीचे अंदाज वर्तवण्यात आलेत. वर्तवण्यात आलेल्या अंदाजात महायुतीला आणि महाविकास आघाडीला मिळणाऱ्या जागांमध्ये फक्त एक ते दोन जागांचा फरक दिसत आहे.

हाती आलेल्या पोलच्या अंदाजानुसार, राज्यात महायुतीला २५ जागा मिळणार आहेत तर महाविकास आघाडीला २१ ते २३ जागा मिळण्याची शक्यता आहे.एक्झिट पोलच्या अंदाजानुसार शरद पवार गटाला सात जागा मिळण्याची शक्यता आहे. त्यामुळे पक्ष फुटीनंतरही शरद पवार गटाला जास्त जागा मिळताना दिसत आहे. महायुतीमध्ये अजित पवार गटाला फक्त १ जागा मिळताना दिसत आहे. शिंदे गटाला ५ जागा मिळण्याचा अंदाज आहे. तर भाजपला १७ मिळण्याची शक्यता आहे.

कोणत्या पक्षांनी किती जागा लढल्या?

राज्यात यंदाची लोकसभा निवडणूक अत्यंत चुरशीची झाली. शिवसेना आणि राष्ट्रवादी काँग्रेसमध्ये फुट पडल्यामुळे ही निवडणूक कशी होणार याकडे जनता कोणाला साथ देणार याकडे सर्वांचे लक्ष लागले होतं. या निवडणुकीत पंतप्रधान मोदी यांच्यासोबतच उद्धव ठाकरे, शरद पवार, देवेंद्र फडणवीस, अजित पवार आणि एकनाथ शिंदे यांची प्रतिष्ठा पणाला लागलीय. दरम्यान आज जाहीर झालेल्या एक्झिट पोलमध्ये महाविकास आघाडीला पसंती मिळताना दिसत आहे.

एबीपी माझा-सी वोटरच्या एक्झिट पोलमध्ये महाराष्ट्रात दिसली रस्सीखेच दिसत आहे. महायुती व मविआला निम्म्या निम्म्या जागांचा अंदाज आहे. महायुतीला २४ तर मविआला २३ जागांचा अंदाज. भाजप १७ , तर शिंदे गटाला ६ जागांचा अंदाज आहे. अजित पवार गटाला फक्त एक जागेवर विजय शक्य असल्याचा अंदाज वर्तवला जात आहे. मविआमध्ये काँग्रेसला ८, ठाकरे गटाला ९ जागा तर शरद पवार गटाला ६ जागा मिळण्याचा अंदाज एक्झिट पोलमध्ये वर्तवण्यात येत आहे.