लोकसभा निवडणुकीसाठी अर्ज भरताना निवडणूक आयोगाकडून उमेदवाराच्या संपत्तीविषयीची माहिती घेतली जाते. उमेदवाराकडे किती रुपयांची प्रॉपर्टी आहे. त्यांचे एकूण उत्पन्न किती आहे. त्यांच्यावर किती रुपयांचं कर्ज आहे, याबाबतची माहिती द्यावी लागते. यंदाच्या लोकसभा निवडणुकीतही निवडणूक आयोगाने उमेदवारांकडून संपत्तीची माहिती घेतली.
या अर्जातून उमेदवारांची एकूण संपत्ती समोर आली आहे. तेलंगणातील गुंटूर लोकसभा मतदारसंघातील तेलुगू देसम पक्षाचे उमेदवार डॉ. चंद्रशेखर पेम्मासानी हे देशातील सर्वात श्रीमंत उमेदवार आहेत. त्यांच्याकडे एकूण ५,७०५ कोटींची संपत्ती आहे. यामध्ये अलिशान गाड्यांचाही समावेश आहे.
चंद्रशेखर पेम्मासानी हे व्यवसायाने डॉक्टर आहेत. १९९९ मध्ये त्यांनी भारतात एमबीबीएसची पदवी घेतली आहे. त्यानंतर पदव्युत्तर पदवीचे शिक्षण त्यांनी अमेरिकेतून घेतलंय. येथील गेजिंजर मेडिकल सेंटरमधून चंद्रशेखऱ यांनी MD पदवी प्राप्त केली आहे.
डॉ. चंद्रशेखर यांच्याकडे एकूण ५,७०५ कोटींची संपत्ती आहे. यामध्ये भारत आणि विदेशातील मालमत्तेचाही समावेश आहे. त्यांच्याकडे १०१ कंपन्यांचे शेअर्स देखील आहेत. याशिवाय जंगम मालमत्तेमध्ये त्यांच्याकडे दोन मर्सिडीज कार, एक टेस्ला आणि एक रोल्स रॉयस कार आहे. त्यांच्यावर १,१३८ कोटी व्यावसायिक कर्जही आहे.
विशेष बाब म्हणजे, २०१९ मधील लोकसभा निवडणुकीत गुंटूरमध्येच टीडीपीचे उमेदवार गल्ला जयदेव देशातील सर्वात श्रीमंत उमेदवार होते. ते अमरा राजा ग्रुपचे एमडी आहेत. त्यांच्याकडे एकूण ६८० रुपयांची संपत्ती होती. यंदा निवडणुकीपूर्वीच त्यांनी राजकारणातून निवृत्तीची घोषणा केली. त्यांच्या जागी डॉ. चंद्रशेखर यांना टीडीपीकडून उमेदवारी मिळाली.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.