Sangli News :

महाविकास आघाडीमध्ये सांगली लोकसभा जागेवरुन टोकाचे मतभेद होताना दिसत आहे. महाविकास आघाडीत जागावाटपाची चर्चा सुरु असतानाच उद्धव ठाकरे यांनी सांगलीच्या लोकसभा जागेवर उमेदवाराची घोषणा केली. यावरुन आमदार विश्वजीत कदम यांनी आक्षेप घेत उघडपणे नाराजी व्यक्त केली. सांगली आमचीच आहे, असं म्हणत विश्वजीत कदम यांनी सांगली लोकसभेच्या जागेवर दावा केला आहे. 'सरकारनामा'ला दिलेल्या मुलाखतीत ते बोलत होते.

जागावाटप अजून झालेले नसताना ठाकरे गटाने सांगलीचा उमेदवार का ठरवला? असा सवाल विश्वजीत कदम यांनी उपस्थित केला. भाजपला रोखण्यासाठी महाविकास आघाडी एकत्र लढत आहे. मात्र या सगळ्यात शिवसेनेचे कुरघोडीचे राजकारण घातकी ठरू शकते, अशी भीतीही विश्वजीत कदम यांनी व्यक्त केली आहे. ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

सांगलीतून काँग्रेसचे विशाल पाटील हेच उमेदवार असतील. विशाल पाटील यांना लोकसभा निवडणुकीत मदत करण्याचा शब्द दिला होता. विशाल पाटील यांना मदत करण्याचं आश्वासन मी त्यांना एक वर्षापूर्वी दिलं होतं. मी शब्द पाळणारा माणूस आहे. त्यामुळे मी विशाल पाटील यांच्या पाठीशी खंभीरपणे उभा आहे, असं विश्वजीत कदम यांनी स्पष्टपणे सांगितलं. (Latest Marathi News)

विश्वजीत कदम यांनी सांगलीच्या जागेवर दावा करताना चंद्रहार पाटील यांना इतर ठिकाणी संधी देण्याचे आश्वासन दिले. उद्धव ठाकरे यांच्याबद्दल मला आदर आहे. जातीयवादी शक्तींविरोधात लढण्यासाठी आम्ही आघाडी केली आहे. तसेच चंद्रहार पाटील हे माझे चांगले मित्र आहेत. भविष्यात राज्यातील कोणत्याही सभागृहात, विधान परिषदेवर त्यांना संधी देण्यासाठी मी आघाडीतील ३ पक्षांच्या नेत्यांना विनंती करेन आणि त्यासाठी पुढाकार घेईन, असंही विश्वजीत कदम यांनी म्हटलं.