बीड, ता. २७ एप्रिल २०२४

'प्रीतम मुंडेंची काळजी करु नका, मी त्यांना नाशिकमधून उमेदवारी देईन..' असे विधान बीड लोकसभेच्या उमेदवार पंकजा मुंडे यांनी केले होते. एकीकडे नाशिकच्या जागेवरुन महायुतीत रस्सीखेच सुरू असतानाच त्यांनी केलेल्या या घोषणेमुळे राजकीय वर्तुळात जोरदार चर्चा रंगल्या होत्या. यावर आता पंकजा मुंडे यांनी स्पष्टीकरण दिले असून सहज हे विधान केल्याचे त्यांनी म्हटले आहे.

बीड लोकसभेच्या उमेदवार पंकजा मुंडे आज बीड विधानसभा दौऱ्यावर आहेत. एका मंगल कार्यालयात पंकजा मुंडे यांच्या उपस्थितीत बुथ प्रमुखांचा मेळावा आणि मतदार जागृती अभियान बैठक पार पडली. या बैठकीला पंकजा मुंडे यांनी मार्गदर्शन केले. यावेळी माध्यमांशी संवाद साधताना पंकजा मुंडे यांनी नाशिकवरुन केलेल्या विधानाबाबत स्पष्टीकरण दिले आहे.

काय म्हणाल्या पंकजा मुंडे?

"समज होणाऱ्या लोकांच्या ना समजपणाचे हे लक्षण आहे, असे काही नाही. एखादा विषय सहज बोलले. प्रीतम ताईंचे सासर तिकडे आहे. तिकडून स्वागत देखील झाले याबाबत मी अगदी सहज बोलले होते. परंतु त्याचे वेगवेगळे अर्थ काढले गेले. लोकसभा, विधानसभेविषयी तर मी बोललेच नव्हते," असे पंकजा मुंडे यांनी यावेळी म्हटले.

नाशिकवरुन रस्सीखेच सुरुच..

दरम्यान, नाशिक लोकसभेच्या जागेवरुन महायुतीमध्ये अद्याप संभ्रम कायम आहे. या जागेवर शिवसेना शिंदे गटाचा अधिकार असून उमेदवारी आपल्यालाच मिळणार, असा दावा विद्यमान खासदार हेमंत गोडसे यांनी केला आहे. दुसरीकडे राष्ट्रवादी अजित पवार आणि भाजपकडून देखील नाशिकची जागा मिळवण्यासाठी प्रयत्न सुरू आहे.