आपल्या शरीरात यकृत हा एक अत्यंत महत्त्वाचा अवयव आहे. अन्नपचन, शरीरातील टॉक्सिन्स बाहेर टाकणं, ऊर्जा निर्मिती आणि इतर अनेक महत्त्वाच्या क्रिया लिव्हरच्या सहाय्याने होतात. मात्र ज्यावेळी लिव्हर व्यवस्थित काम करत नाही त्यावेळी त्याचे परिणाम पूर्ण शरीरावर दिसू लागतात.

तज्ज्ञांच्या म्हणण्यानुसार, लिव्हर खराब झाल्याचे संकेत पहिल्यांदा पायांमध्ये दिसून येतात. ही लक्षणं वेळेत ओळखून उपचार न घेतल्यास पुढे जाऊन गंभीर लिव्हर रोगांची शक्यता वाढते. लिव्हरची ही लक्षणं कोणती आहे ते पाहूयात.

पाय आणि घोट्यांमध्ये सूज येणं

लिव्हरचं काम बिघडल्यावर विशेषतः सिरोसिससारख्या गंभीर स्थितीत शरीरात प्रोटीन तयार होणं कमी होतं. प्रोटीनचं प्रमाण रक्तात घटल्यामुळे शरीरात द्रव साचायला लागतो. हा द्रव प्रामुख्याने घोट्यांमध्ये आणि पायांमध्ये जमा होतो, ज्यामुळे तिथं सूज येते.

पायांच्या त्वचेत खाज येणं

ज्यावेळी लिव्हर नीट पित्त शरीरातून बाहेर टाकू शकत नाही तेव्हा ते शरीरात साचायला लागतं. याचा प्रभाव त्वचेवर दिसून येतो विशेषतः पाय आणि तळहातांमध्ये तीव्र, सतत होणारी खाज जाणवते. ही खाज इतकी असह्य असते की, त्याचा तुमच्या झोपेवरदेखील परिणाम होतो.

पायात मुंग्या येणे किंवा सुया टोचल्यासारखं वाटणे

लिव्हरचा आजार दीर्घकाळ असला तर त्याचा परिणाम नर्व्हस सिस्टिमवर होतो. यामुळे पायात मुंग्या येणं, सुई टोचल्यासारखं जाणवणं किंवा आग होणं ही लक्षणं जाणवू लागतात. हे लक्षण ‘पेरीफेरल न्युरोपॅथी’ या नावाने ओळखलं जातं आणि यकृताच्या कार्यात बिघाड झाल्याचं हे एक गंभीर संकेत असतो.

पायांची त्वचा पिवळी पडणं

लिव्हर योग्य प्रकारे बिलीरुबिन बाहेर टाकू शकत नाही तेव्हा त्याचं प्रमाण वाढून जॉन्डिसची स्थिती उद्भवते. यामुळे चेहरा, डोळे यांच्यासोबतच पायांची त्वचा पिवळसर दिसते आणि नखांमध्येही रंगत बदल होतो. या बदलांवर वेळेत लक्ष दिलं नाही तर स्थिती अधिक गंभीर होऊ शकते.

पायांच्या स्नायूंमध्ये कमजोरी

क्रॉनिक लिव्हर डिजीजमुळे शरीरातील स्नायूंची ताकद कमी होते. याचा थेट परिणाम पायांमध्ये वेदना जाणवणं, चालताना दम लागणं आणि स्नायूंमध्ये वारंवार cramps येणं अशा स्वरूपात होतो.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.