आजच्या धावपळीच्या जीवनात उच्च रक्तदाब म्हणजेच हाय ब्लड प्रेशरची समस्या मोठ्या प्रमाणात वाढताना दिसतेय. विशेष म्हणजे आता कमी वयातही अनेकांना बीपीचा त्रास होताना दिसतोय. ब्लड प्रेशर नियंत्रणात ठेवण्यासाठी डॉक्टर गरजेनुसार औषधं सुरू करतात. मात्र औषधं घेतल्यानंतर बीपी नॉर्मल झाला की काही जण डॉक्टरांचा सल्ला न घेता गोळ्या बंद करतात.

मात्र अचानक अशी औषधं घेणं बंद करणं आरोग्यासाठी धोकादायक ठरू शकतं का? यामुळे हार्ट अटॅकचा धोका वाढतो का? याबाबत सर गंगाराम रुग्णालयाचे वरिष्ठ हृदयरोग तज्ज्ञ डॉ. रजत मोहन यांनी माहिती दिलीये.

डॉ. रजत मोहन यांनी आजतकशी बोलताना सांगितलं की, एखाद्या व्यक्तीचा बीपी बराच काळ वाढलेला राहिला तर त्याचा परिणाम हृदयावर होऊ शकतो. त्यामुळेच बीपी नियंत्रणात ठेवण्यासाठी डॉक्टर औषधं सुरू करतात. मात्र प्रत्येक वेळी बीपी वाढला म्हणून लगेच औषधं सुरू केली जात नाहीत. जेव्हा बीपी वारंवार वाढलेला राहतो आणि खाण्यापिण्यात बदल, व्यायाम त्याचप्रमाणे जीवनशैलीत सुधारणा करूनही तो नियंत्रणात येत नाही. त्यावेळी डॉक्टर औषधं सुरू करण्याचा निर्णय घेतात.

प्रत्येकाला लगेच बीपीची गोळी लागतेच असं नाही

डॉ. रजत मोहन यांच्या मते, बीपीची औषधं सुरू करायची की नाही, हा निर्णय डॉक्टर घेतात. एकदाच बीपी जास्त आला म्हणून स्वतःहून औषध सुरू करू नये. डॉक्टर काही काळ बीपीच्या रीडिंगकडे लक्ष ठेवण्यास सांगू शकतात. वेगवेगळ्या दिवशी अनेक वेळा बीपी वाढलेला दिसत असेल, तर डॉक्टर औषधं सुरू करण्याचा सल्ला देऊ शकतात.

बीपीची औषधं आयुष्यभर घ्यावी लागतात का?

बीपीची औषधं सुरू झाली म्हणजे ती कायमच घ्यावी लागतात असं प्रत्येक वेळी होत नाही. जसं की, एखाद्या व्यक्तीचं वजन खूप जास्त असेल आणि वजन कमी केल्यानंतर त्याचा बीपी नॉर्मल येत असेल तर काही परिस्थितीत डॉक्टर औषधं कमी करू शकतात किंवा बंद करण्याचा निर्णय घेऊ शकतात.

तसंच, एखाद्या व्यक्तीचा आहार आणि जीवनशैली योग्य असेल आणि त्याचा बीपी सातत्याने नियंत्रणात राहत असेल तरी काही प्रकरणांमध्ये डॉक्टरांच्या सल्ल्याने औषधं कमी किंवा बंद केली जाऊ शकतात. मात्र हा निर्णय रुग्णाने स्वतः घेऊ नये. औषधं कमी करायची किंवा बंद करायची की नाही, हे डॉक्टरच ठरवतात.

बीपीची औषधं मध्येच बंद केल्यास काय होऊ शकतं?

डॉक्टरांनी बीपीची औषधं सुरू केली असतील तर ती स्वतःच्या मनाने बंद करू नयेत, असं डॉ. रजत मोहन सांगतात. अनेक जण बीपी सामान्य आल्यानंतर गोळी घेणं बंद करतात. मात्र औषधं बंद केल्यानंतर बीपी पुन्हा वाढू शकतो.

बीपीची औषधं मध्येच बंद करणं आणि त्यानंतर बीपी बराच काळ वाढलेला राहणं यामुळे हृदयाशी संबंधित आजारांचा धोका वाढू शकतो. यासोबतच हार्ट अटॅक येण्याचा धोकाही वाढू शकतो. त्यामुळे बीपी सामान्य आला म्हणून औषधं स्वतःहून बंद न करता डॉक्टरांचा सल्ला घेणं महत्त्वाचं आहे.